5 من أفضل ألعاب البلاي ستيشن في ٢٠١٨
صناع العاب بلاي ستيشن بيحبوا يعملوا لنا مفاجأة كل فترة مع الأعلان عن العاب الكترونية جديدة بيتم تصميمها لمنصة الألعاب الأشهر في العالم. والحقيقة أننا ملاحظين حالة من الانتعاش والتنوع في الألعاب اللي بيتم طرحها في الأسواق مؤخرا. علشان كده حبينا نعرض لكم في الموضوع ده 5 من أفضل ألعاب البلاي ستيشن اللي شوفناها مؤخرا وعجبتنا.
Fifa2018
واحدة من أشهر العاب كرة القدم على مستوى العالم. وتقريبا مافيش بيت أو سايبر فيه بلاي ستيشن الا وفيه نسخة من اللعبة، أو من اللعبة المنافسة لها PES واللي بتخش في منافسات قوية معاها من خلال المشجعين المتعصبين لكل لعبة من اللعبتين.
الجديد والمميز في اللعبة هو توفيرها لانماط مختلفة لمحبي كرة القدم، مع ظهور شخصيات كروية ورياضية مهمة وجديدة، وطبعا طور اللعب اونلاين واللي بيخلي متعة اللعب أفضل أو حتى اللعب مع الأصدقاء في المنزل واللي بتاخد المنافسة لمستوى أعلى.
Far Cry5
جزء جديد من سلسلة ألعاب Far Cry مع كل ما يميز السلسلة دي من عالم مفتوح وسيناريوهات مختلفة للعب. والمرة دي بنشوف مدينة أمريكية ريفية بتسيطر عليها طائفة دينية متشددة، وبيقوم اللاعب بدور شخص بيواجه جبروت الجماعة دي بمساعدة أهل البلد اللي بينظموا حركة للمقاومة.
اللعبة بتتميز بنمط اللعب المفتوح مع نمط مميز للعب بمشاركة الأصدقاء أونلاين، كمان بنشوف في الجزء الجديد تنوع كبير في الأسلحة وظهور شخصيات جديدة ومتميزة.
God Of War
واحدة من أقوى الألعاب اللي انتظرها محبي الألعاب العنيفة مؤخرا. اللعبة قائمة على قصة كراتوس اللي بيدرب أبنه على الفنون القتالية، ومجموعة من المواقف الصعبة اللي هايكون على اللاعب انه يخرج منها بالذكاء والتخطيط والمواجهة المباشرة في كتير من الأحيان.
اللعبة قدرت في أجزائها السابقة تحقق مبيعات كبيرة وتخلق لنفسها جمهور بيستنى كل جديد منها، وده اللي حصل بمجرد طرح اللعبة واقبال كتير من اللاعبين عليها علشان يعرفوا أيه الجديد اللي هايشوفوه المرة دي.
Call Of Duty Black OPS 4
واحدة من أكتر الألعاب اللي بينتظرها محبي وعشاق البلاي ستيشن في كل مكان. خاصة أن اللعبة بتأتي معتمدة على سلسلة ألعاب بتحمل نفس الأسم وحققت مبيعات خرافية واقبال غير عادي. والمميز في اللعبة دي أنها هاتعطي أولوية قصوى للعب اونلاين مع الاهتمام بنمط القصة اللي هاييجي بمستويات صعوبة أعلى ومستوى جرافيك خيالي.
Yakuza 6
واحدة من أشهر العاب العصابات واللي قدرت تحقق نجاح سريع في وقت قياسي. اللعبة بتاخدنا لجولة في عالم العصابات وبتتيح أكتر من نمط لعب مختلف علشان تناسب كل أذواق اللاعبين. كمان اللعبة وصل لها تحديثات كبيرة على مستويات الجرافيك وطريقة اللعب بحيث تقدم تحديثات قوية وفي نفس الوقت لا تخسر ولاء اللاعبين الأصليين للسلسلة.
