7 أرواح : مش هاتلحق تتنفس مع المسلسل ده!
على الرغم من دوامة المط والتطويل اللى بتقع فيها كتير من مسلسلات رمضان، الا ان مسلسل 7 ارواح كان على العكس من كل ده… رتم سريع ومشاهد مختصرة بتقدم جرعة كبيرة من التشويق والاثارة بشكل خلانا حاسين اننا مش قادرين ناخد نفسنا من سرعة تلاحق الاحداث والـ Plo Twist اللى عماله تحصل كل شوية.. ده كان من اهم مميزات المسلسل… وبرضو من اهم عيوبه!
المسلسل بيحكي عن ظابط شرطة فى أخر يوم له فى العمل، من فترة قصيرة قدر يسلم واحد من أشهر رجال الأعمال لحبل المشنقة فى قضية قتل ممثلة مشهورة، وقرر الإعتزال وهو على قمة المجد والتفرغ لقضاء وقت مع زوجته اللى حاسه طوال الوقت ان عمل زوجها واخده منها.
مكالمة تليفون واحده بتغير كل شىء.. صوت مجهول بيطلب من بطلنا (خالد النبوي) انه يقابله فى مكان ما… الصوت لسيدة بنكتشف بعد كده انها الفنانة اللى هايتشنق رجل الأعمال بتهمة قتلها، وانها لسه على قيد الحياة وان خالد النبوي ارتكب اكبر غلطة مهنية له بتسليمه متهم برىء لحبل المشنقه بيديه.
على الرغم من ان التيمة جديدة ومبتكرة، الا ان القصة مش بتقف عند هنا وخلاص.. بنشوف جانب اخر من القصة من خلال مجموعة من رجال الاعمال زي كاريمان او رانيا يوسف و وليد فواز و اياد نصار، واللى بتقوم بينهم معركة تكسير عظام للتنافس على تركة رجل الأعمال اللى بيتم تقديمه للإعدام، وبتتوالى الاحداث اللى مش عاوزين نحرقها عليكم.
فى بداية مشاهدتنا للمسلسل حسينا ان الاداء التمثيلي للفنان خالد النبوي مش قوي، وانه كان يقدر يقدم اداء افضل من كده، لكن مع استمرار متابعتنا للأحداث ومعرفتنا بكتير من خلفيات شخصية النبوي فى المسلسل –مش عاوزين نحرقها عليكم- عرفنا ان اداؤه التمثيلي عبقري يقترب من الكمال، واننا فعلا امام ممثل عبقري قادر يقدم اداء استثنائى لشخصية ظابط الشرطة اللى شوفناها قبل كده من معظم فنانين وممثلين مصر.
وليد فواز بيكرر نفسه بطريقة أداءه اللى مش فارقه كتير عن دوره فى مسلسلات كتير قدمها قبل كده او حتي فى سباق رمضان الحالي زي ازمة نسب أو الطبال على سبيل المثال.
رانيا يوسف بتقدم أداء شبه أداء شخصيات تانيه قدمتها فى دور السيدة الجميلة اللى الكل بيحاول يوصل لها، لكننا بنراهن ان دورها هايشوف تطورات متميزة فى الحلقات القادمة بالنسبة لشخصيتها، وبشكل عام المسلسل فيه تطورات كتير جدا بنتوقع حدوثها وده اللى كنا بنقوله كعيب من عيوب المسلسل، وهو ان فيه كمية Twist كبيرة جدا بتخلينا بنتأرجح خلال الحلقة الواحدة فى مواقف كتير، ويمكن لو كانت التغيرات دي اقل شويه رتم المسلسل كان هايكون مظبوط بنسبة 100%.
7 أرواح مش أفضل مسلسل فى رمضان، لكنه بينافس بقوة وأبطاله بيبذلوا قصاري جهدهم لأمتاع المشاهدين وده فى راينا اهم من أي لقب.
بطولة : خالد النبوي – اياد نصار – رانيا يوسف – وليد فواز
يعرض علي : اوربت مسلسلات 6:30 ص – اون تي فى 7 ص – الظفرة 12 مساء
اخراج طارق رفعت
تاليف محمد سيد بشير
