Barbie in Princess Power : أنيميشن خفيف للأطفال
من وقت للتانى بيكون من الجميل اننا نشاهد فيلم مخصص من البداية للنهاية للأطفال، بمعني ان الابهار او المؤثرات الخاصة لا تكون الهدف الاول والاخير من وراء فيلم الانيميشن، لكن القصة البسيطة والاداء الغير مفتعل، والدراما القائمة على الاحداث الهادفة، فيلم خفيف ومناسب للاطفال، بعيدا عن الميزانيات الضخمة والافلام عالية التكلفة.
من تأليف مارشا جريفين و اخراج زيكي نورتون، بنشوف قصة الأميرة الشهيرة (باربي) واللى بتظهر باسم وشخصية مختلفة فى الفيلم (اسم باربي لم يذكر اطلاقا فى الفيلم) اللى بيغلب عليه الطابع التليفزيوني (زي الافلام التليفزيونية فى مصر)، بمعني اننا بنشوف ابهار اقل، مؤثرات اقل، ولاحظنا ايضا بعض المشاكل فى التحريك والرسومات، لكن بشكل عام يعتبر الفيلم مناسب تماما للاطفال، الامر اللى بيخليه مناسب للعائلات اللى عاوزه تسيب اولادها فى السينما امام فيلم (أمن) ولوقت مناسب للتفرع للتسوق (مثلا).
الاداء الصوتي لـ ريبيكا حسين واللى ماعندناش اى معلومات عن اصولها اللى شعرنا من الاسم انها ممكن تكون عربية، ايضا اداء بريت ايرفن وديفيد كاي وغيرهم، الاداء الصوتي كان كويس ومتناسب مع الشخصيات، كمان الموسيقي التصويرية كانت متميزه وبعض مقاطعها علق فى اذهاننا.
مانقدرش ننكر شعورنا الشديد بالملل من الاحداث، لكن زى ما قولنا الفيلم موجه بالمقام الاول للاطفال، وعلى الرغم من الملل اللى تسرب لنا، الا اننا لا نستطيع الجزم ان الفيلم سىء، لانه يعتبر فيلم قوي كفيلم موجه للاطفال فى زمن سيطرت فيه الافلام ذات الميزانيات الضخمة على مقاليد كل شىء.
كلامنا عن Barbie in Princess Power ممكن يكون قليل، لكن ده كل شىء نقدر نقوله عن الفيلم، ونقدر نختصر كلامنا كله فى سطر واحد : لو عندكم اطفال وعاوزين تفرجوهم على فيلم انيميشن تقليدي مافيهوش اى مفجأت غير ساره (من حيث نوعية المشاهد وخلافه)، ساعتها فقط ممكن الفيلم يكون مناسب لكم.
