خواطر11 : فقه الذكاء الاعلامي
الأذكياء فقط هم اللى عارفين كويس، ان افضل وقت للاعتزال او ايقاف سلسلة معينة يكون فى قمة نجاحها.. محرر كايرو360 فاكر كويس جلسة شخصية جمعته بالكاتب الشهير أحمد خالد توفيق قبل ايقافه سلسلة ما وراء الطبيعة اللى كان بيكتبها لسنوات وسنوات.. الدكتور احمد قال له يومها انه قرر يتوقف عن كتابة السلسلة بارادته قبل ما يطالبه القراء نفسهم بالتوقف عن الكتابه! ويبدو ان ده نفس القرار اللى اخده احمد الشقيري بايقاف برنامجه (خواطر) بعد الموسم حالى رقم 11.
البرنامج بيبدأ بتتر متميز مقتبس فيه ايات قرأنية مرسومة ومكتوبه بفونات جميلة، مع موسيقي حماسية محفزه.. التتر بيناقش فكرة ازاى خلق الله الارض ممهدة للناس علشان يستفيدوا منها، لكنهم بغبائهم وجهلهم نشروا فيها الفساد فى البر والبحر.. بالاضافة لافكار كتير تانيه.
الحلقة الأولى فى البرنامج خصصها الشقيري للكلام عن باقى الحلقات اللى هايستعرضها على مدار الشهر الكريم، مابين مناقشة افكار اقتصاديه واجتماعية وتنمويه وتغطيات لمسابقات تحفيز للمخترعين العرب، وسفر لبلاد اوروبية وعربية كتير، وطبعا لاحظنا ان مصر بتحصد الاهتمام والتغطية الاكبر من وقت واهتمام البرنامج.
بداية من الحلقة الثانية بدأ الشقيري فى الدخول مباشرة لصلب مواضيع حلقاته زي الحرية المالية، وقضايا الاجئين وتكتيكات زوجية ومشاكل المرور، وبيظهر استخدام مكثف للمونتاج القوي والمؤثر فى البرنامج، بحيث يقدم الشقيري فى كل حلقة (كبسولة خواطر) مضغوطة ومكثفة ومفيده.
الجهود الشخصية لمقدم البرنامج طاغية على العمل بشكل كبير، لكن ايضا الجهود الانتاجية اللى بتخليه يقدر يسافر تقريباً لكل انحاء العالم ويقدر ياخد خطوات ايجابية فى البلدان العربية النامية كلها امور تدل على ان البرنامج بيتم دعمه ماليا بشكل قوي ومتميز.
الموسيقي التصويرية الهادئة اللى بتصاحب الخواطر، والمختلفة عن الموسيقي الاكثر جرأه لتترات البداية، بتدخلنا فى مود البرنامج بشكل سلس ومتميز، كمان خفة ظل الشقيري وقدرته على انتزاع الضحكات من المواقف الصعبة اللى ممكن تقابله دون ابتذال او استظراف بتؤثر ايجابيا فى المشاهد، الامر اللى دفع بعض المشاهدين لحصر الفروق بين الشقيري وبين رامز جلال. وطبعا مش محتاجين نقول كفة المقارنة كانت لصالح مين!
خواطر برنامج متميز هانزعل على توقفه بعد الموسم 11، لكن كلنا عارفين ان اكيد قريحة احمد الشقيري هاتخرج علينا ببرنامج اقوي، من مقدم البرامج اللى تم اختياره كواحد من اكثر الشخصيات تاثيرا فى الوطن العربي، واللى بيقول على نفسه : لست عالما ولا مفتيا ولا فقيها، وانما طالب علم!
