The Forest : فيلم رعب غير مرعب!
عارفين ايه اكتر حاجه مزعلانا وحارقه دمنا بخصوص The Forest ؟ انه كان ممكن يكون فيلم متميز، وكان ممكن يقدم مجموعة من الأحداث اللى تنشف الدم فى العروق فعلاً، خاصة انه معتمد على مكان حقيقي وله تاريخ مظلم ومثير للخوف حتي لحظة كتابة هذه السطور، لكن المخرج (جيسون زادا) أصر على انه يهبط بالفيلم لمستنقع من الملل والتكرار وعدم الرعب.. لحد ما اضطرينا نعطيه نجمه واحده! او اقل!
من بطولة ناتالى دورمر و أوين ماكين بنشوف قصة سيدة شابه بتضطر للذهاب فى رحله كلها مخاطر لجزيرة اسمها (جزيرة الأنتحار) للبحث عن شقيقاتها التوأم.. الأمر اللى بيدخلها فى سلسلة من الأحداث (المفروض) انها مرعبه ومخيفه الى اقصى درجه.. لكن الصراحه الرعب كان اخر شعور ممكن يسيطر علينا امام سطحية الأحداث وضعف الأداء التمثيلي!
يمكن الشىء الوحيد المفيد اللى عرفناه من الفيلم هى ان (غابة الانتحار) مكان حقيقي بالفعل، لغابة فى اليابان مساحتها حوالى 35 كيلو متر مربع، وبتدور حواليها قصص مرعبه كتيره عن حوادث انتحار بتدور فيها طوال الوقت، الامر اللى جعل السلطات اليابانية تعمل دوريات لمنع حالات الانتحار اللى وصلت لأكثر من 500 شخص!
نرجع للفيلم.. الاداء التمثيلي كان ضعيف جدا ومفتعل وملىء بالمبالغات.. وده كان نتيجة مباشرة من وجهه نظرنا للسيناريو الضعيف والقابل للتوقع واللى تقريبا كنا عارفين تفاصيل كل مشهد قادم فى زمن الفيلم.. وده بالتاكيد ان دل على شىء يدل على ضعف الاخراج وعدم قدرة المخرج على التملك من ادواته.. وعرفنا بالصدفه ان ده اصلا الفيلم الاول له.. يعني كلامنا فيه ما يؤيده على ارض الواقع!
على الرغم من محاولة الموسيقي التصويرية والمؤثرات الخاصة تعويض النقص فى باقى عناصر الفيلم، الا ان المحاولة هى كمان كانت ضعيفه وغير موفقه، لكن لو ها يتم اجبارنا على اختيار افضل عنصر فى الفيلم.. هانختار المؤثرات الخاصة مش علشان هى كويسه.. علشان هى افضل الوحشين بس!
كلامنا عن The Forest قليل لان الفيلم مايستحقش اكتر من اللى قولناه.. لكن ننصحكم بالبحث اكتر عن (غابه الانتحار)، واننا نتعشم يتم انتاج عمل محترم وقوي يناقش الغابة اليابانية الاكثر غموضا ورعبا!
