Capture The Flag : حلم الوصول للقمر
فى نفس الوقت اللى كتير من الأطفال اللى على أعتاب المراهقة فى مصر بيقضوا وقتهم فى لعب البلاي ستيشن أو محاولة الهرب من الدروس الخصوصية، بنشوف فيلم من إنتاج أسباني أمريكي بيحكي وبيشجع وبيخلق الأمل داخل الأطفال على ضرورة التفكير فى النجوم والسفر فى الفضاء وتقديس العلوم.. ونرجع فى الأخر نقول إيه السبب فى تأخر بلادنا العربية.. احنا بس مش مهتمين بنوعية الفنون اللى بتقدمها شاشاتنا!
من إخراج انريكي جاتو و أداء صوتي من داني روفيرا و ميشيل جينر بنشوف قصة طفل صغير بينتمي لأسرة كلها تقريباً من رواد الفضاء، ومن هنا بيتولد عنده الحلم انه يسافر للقمر، خاصة مع تزامن أحلامه بخطة أحد الأشرار لسرقة العلم الأمريكي من القمر، ومن هنا بتبدأ المغامرة الأساسية للفيلم، والمرتبطة بكتير من الكوميديا والمرح.
الفيلم فى مجمله بيقدم كتير من المواقف الكوميدية والمرحة، لكننا مش قادرين ننسى الرسالة الخفية اللى بيحاول الفيلم يوصلها، وهى ضرورة التمسك بأحلامنا والإيمان بها، والسعي وراها مهما كان الموضوع يبان صعب أو مستحيل الوصول فى البداية، ومهما كانت سخرية الناس من طموحاتك ومحاولتهم تكسير عزيمتك، هاتقدر تنتصر عليهم وتحقق اللى بتفكر فيه.
الكلام قد يبدو كبير بالنسبة لفيلم أنيميشن معمول لتسلية المشاهدين أولاً وأخيراً، لكن فى رأينا ده شىء يحسب للفيلم، وهى قدرته على تقديم رساله مهمه وفى نفس الوقت تقديم التسلية والمتعة لكل أفراد الأسرة.
الموسيقي التصويرية كانت متناغمه جدا مع الأحداث، وفى رأينا لو كان للفيلم أبطال تانيين غير اللى قاموا بالأداء الصوتي كان الوضع هايكون أفضل، ويمكن ده كان أسوأ شىء فى الفيلم زي ما كانت الموسيقي التصويرية هى أجمل شىء فى الفيلم.
مستوي التحريك والخدع السينمائية للفيلم كان جيد.. مش افضل حاجه شوفناها فى حياتنا طبعا، لكن الفيلم كان مستواه التقني جيد وقابل للمشاهدة من كل افراد العائلة
كلامنا عن capture the flag خلص.. لكن كلامنا عن ضرورة اقتباس التجربة دي ومحاولة تقديمها فى افلامنا اللى بتخاطب الأطفال هايكون نقله متميزه فى صناع السينما فى مصر.. بس هل احنا عندنا افلام بتخاطب الأطفال أصلا؟!
