Exposed : جريمة غير مرغوب فى التحقيق فيها!

هى دي الجملة اللى بيتخذها الفيلم شعار له، والحقيقة فى بداية مشاهدتنا لأحداث الفيلم كان عندنا شعور بالتساؤل.. ليه بعض الجرايم ما نحققش فيها؟ ليه مايتمش اعلان الحقايق لكل الناس ورد الكرامة والإعتبار لكل انسان برىء؟ هو ده السؤال اللى جاوب لنا الفيلم عليه بالتفصيل.

من إخراج جي ماليك لنتون وبطولة كيانو ريفز و كريستوفر ماكدون و ميرا سورفينيو وانا دي ارماس بنشوف جريمة قتل ظابط شرطة بشكل غامض.. طعنتين بسكين فى الظهر ومنظر بشع وتساؤل طوال الوقت.. مين من مصلحته يعمل كده؟

كيانو ريفز بطل الفيلم هو شريك الشرطي المقتول، واللى بيدور طوال الفيلم على مين اللى من مصلحته قتل شريكه، لكن الإجابة على السؤال مكانتش أبداً بنفس سهولة طرح السؤال..

الشرطي القتيل كان متورط فى كتير من العمليات الغير شرعية، وكان له كتير من الأعداء اللى يتمنوا موته، بالتالى بيصحبنا الفيلم فى رحلة شائكة لمحاولة معرفة مين الجاني الحقيقي، وفى نفس الوقت بنشوف قصة حياة (انا دي ارماس) البنت البريئة اللى بترتبط بجندي فى القوات المسلحة الأمريكية، واللى بيسافر العراق لمهمة قتال، وفى نفس الوقت بنشوف (انا) واللى بتنحدر من عائلة متدينة، وبيحصل لها كتير من الأمور الخارقة للعادة، واللى بتحطها فى طريق التحقيق فى جريمة  القتل.

الفيلم محتاج  تركيز كبير فى مشاهدته، لانه مش بيقدم الاجوبة على الاسئلة بسهوله وبيسيب كل الابواب مفتوحة امام ذهن المشاهد، وللاسف بييجي الحل فى نهاية الأحداث تماما بعد ما يكون المشاهد مل من التطويل والغموض، لاننا زي ما احنا عارفين ان معادلة الغموض فى اي فيلم لو طالت عن زمن معين بيبدا المشاهد يحس بالتطويل والملل والزهد فى معرفة السر وراء الأحداث، وده اللى حصل لنا مع Exposed .

كيانو ريفز بيعود بأداء قوي وحقيقي وقدر يقنعنا بدوره فى الفيلم، حتي فى اللحظات اللى كان بيقدم فيها انفعالات ميلودرامية كان قادر يقوم بدوره على افضل ما يمكن، لكن افضل مشاهد شوفناه فيها كانت مشاهد الإندفاع والغضب والعصبية، وقدر يوصل لنا شعوره فيها بالشكل الأمثل

الجميلة انا دي ارماس قدرت تعمل دور مهم وقوي، وخرجت بره شخصيتها الاصلية تماما وقدرت تقدم لنا شخصية بنت بتواجه تحديات صعبه، والحقيقة اننا مش قادرين نقرب قوي من تفاصيل دورها علشان مانحرقش احداث الفيلم، لكن الشخصية قوية والدور فيه تحدي كبير لها ولقدراتها التمثيلية.

الخدع السينمائية فى الفيلم كانت ضعيفة جدا، ومش عارفين ليه تم الزج بخيط من احداث ما وراء الطبيعة فى الفيلم، وده كان من الامور السئية جدا فى الأحداث واللى حسستنا ان الفيلم بيحاول يسحبنا فى منطقة مش بتاعتنا، وبالتأكيد مش بتاعة القائمين عليه انفسهم.

Exposed فيلم قوي محتاج تركيز ودماغ رايقه فى مشاهدته، ومحتاج نفسيه قوية مستعدة لتلقي الصدمات والمفجأت اللى بيقدمها الفيلم بعد شويه من الملل تسربوا لنا قرب نهاية الأحداث.