المراجعة النهائية السينمائية قبل رمضان ٢٠١٦
لولا إختلاف الأذواق لبارت السلع فى الأسواق.. هو ده المثل الشعبي القديم اللى شجعنا على كتابة الموضوع ده… فعلى الرغم من إن رمضان هو الشهر الرسمي للمسلسلات والأعمال الدرامية، إلا إننا لازم نحترم اختيارات بعض المشاهدين اللى مش بيحبوا يتابعوا الدراما فى الشهر ده، علشان كده حضرنا لكم لسته بشوية حاجات تعملوها خلال رمضان تخليكم جاهزين للموسم السينمائي القوي اللى هيبدأ بنهاية الشهر الكريم مباشرة.
- أفلام الـ Super Heros
الحقيقة إن سنة 2016 هى سنة الـ Super Heros بلا منازع… سوبر مان وبات كان وسبايدر مان وحتي Ant man و أيرون مان كلهم كانوا ضيوف علينا فى أفلام سواء جمعتهم ببعض أو ضد بعض أو حتي كل بطل بشكل منفصل عن الأخر… رمضان ممكن يكون الشهر المناسب للفرجه على سلاسل أفلام سابقه زي سلسلة أفلام Spider Man أو Guardians of the Galaxy إستعداداً للأفلام والأجزاء الجديدة من السلاسل دي واللى هايتم عرضها قريباً فى دور العرض.
- وجبة رعب دسمة.. إستعد لها
الرعب من تيمات الأفلام اللى مش بتموت أبداً.. لازم من دلوقت تستعدوا بمراجعة أفلام زي The Conjuring و The Purge علشان من المتوقع إصدار أجزاء تانيه من السلاسل دي قريباً جداً، كمان عندنا فيلم متوقع صدوره قريباً هو The Shallows وبيحكي عن فتاة شابه بتتعرض لمحاصرة أسماك القرش، وهو فيلم بيفكرنا بسلسلة أفلام Open Water واللى كانت بتتكلم عن موضوع مشابه… ممكن تستغلوا الأيام الجاية لمراجعة الأفلام دي والإستعداد للأفلام الجديدة منها.
- الأنيميشن… أفلام ورا أفلام!
من الرعب للأنيميشن! كمية كبيرة جداً من الأفلام هاتضرب السوق السينمائى فى الفترة الجايه.. إحنا بنحذركم يا محبى الأنيميشن لازم تبدأوا من دلوقت مراجعة أفلامكم المفضلة إستعداداً لأفلام تقيله زي Ratchet and Clank و Blinky Bill: The Movie وغيرها من الأعمال، كمان رمضان هايكون فرصه ممتازة لمراجعة فيلم زي Finding Nemo إستعداداً لإصدار الجزء الجديد منه.
- الكلاسيكيات… من فات قديمه تاه!
لا يمكن ننسى الأعمال الكلاسيكية اللى اثرت فينا كلنا… فيلم زي Ithaca واللى هايتم عرضه قريباً ومن بطولة توم هانكس و ميج رايان وبيحكي عن ولد بيتم إعداده من الصغر علشان يكون أسرع ناقل رسائل تلغراف فى العالم! الفيلم ده بيفكرنا بفيلم تاني من بطولة توم هانكس أيضا وهو فيلم Cast Away، كمان عندنا فيلم Inferno واللى يعتبر جزء تاني لفيلم The Da Vinci Code، ومين يقدر ينسى النينجا تيرتلز واللى راجعين لنا بفيلم قوي هو Teenage Mutant Ninja Turtles: Out of the Shadows … كل دي أفلام تستحق المراجعة وهاتفيدنا جداً وإحنا بنشوف الأفلام دي بعد رمضان.
- الخيال العلمي.. أفلام مهمة فى الطريق.
أخر حاجه ممكن نتكلم عنها هى أفلام الخيال العلمي.. بعد سنين طويله جدا بنشوف هجوم جديد للكائنات الفضائية اللى فشلت أخر مره فى غزو الأرض.. كل ده من خلال أحداث فيلم Independence Day: Resurgence واللى هايحتاج مننا إعادة مشاهدة للجزء الأول من نفس السلسلة علشان نقدر نعمل Refresh للأحداث.
