TheSquad : الكاوبوي الفرنساوي!
مجموعة رجال الشرطة الأقوياء اللى بيتمتعوا بخفة الدم وروح المرح، وفى نفس الوقت محترفين وقادرين على توجيه الضربات لأعداؤهم بقوة.. النمط ده من الأفلام مش جديد علينا، وشوفناه كتير فى أفلام متوسطة التكلفة الإنتاجية من هوليود، والحقيقة إن النمط ده من الشخصيات والأفلام اللى بتتناولها قد يكون محبب عندنا شوية بسبب إنه بيفكرنا بأفلام الكاوبوي الأمريكية، واللى كان البطل فيها بيتمتع بنفس الصفات تقريباً.
فى الفيلم اللى اخرجه بنجامين روشيه والفه تريستان شولمان وقام ببطولته جون رينو و سابرينا ويازانا و عمرو دياو و كاترينا مورينو بنشوف قصة فرنسية الطابع والطعم واللون، عن فريق خاص من رجال الشرطة اللى بيتتبعوا عصابة محترفة متخصصة فى السطو على البنوك، وفى سبيل الوصول للعصابة بيبدأوا يكتشفوا إن الموضوع متطلب أكتر من خفة الظل اللى بيتمتعوا بيها، وإن للقصة أبعاد تانية أكثر أهمية وقوة.
على الرغم من إننا قولنا إن النمط ده من الأفلام بيعجبنا، إلا إن خلطة الكاوبوي على الطريقة الفرنسية أثبتت فشلها للأسف، بداية من الأداء التمثيلي الضعيف والمعتمد على الإيفيهات وإظهار إستهتار أعضاء الفريق أكثر من الازم، وغيرها من المشكلات الإخراجية اللى كانت بتبقى أكثر وضوحا مشهد بعد مشهد، أما القشة اللى قسمت ظهر البعير بالنسبة لنا كانت إخراج مشاهد الإكشن واللى كان واضح فيها جداً إن الممثلين خايفين يلمسوا بعض! والإخراج مش عارف يداري على النقطة دي فا أصبحت مشاهد الأكشن فى النهاية هزلية جدا وضعيفة ومبتذلة إلي أبعد الحدود.
على الرغم من تصوير الفيلم فى فرنسا إلا إن إستخدام البيئة الفرنسية والديكورات الفرنسية المشهورة من معالم سياحية وخلافه كان ضعيف جدا وغير مؤثر فى سياق الأحداث، ولو اتقال لنا إن الفيلم بتدور أحداثه فى ألمانيا أو النمسا كنا مش هانلاحظ الفرق! لكن الموسيقي التصويرية كان لها طابع فرنسي شيق فى بعض المشاهد، وقدرت توصل لنا الإحساس بالترقب والاكشن واللى فشلت فيه مشاهد الأكشن نفسها!
TheSquad فى رأينا فيلم بيتسد بيه الساحة السينمائية فى مصر كفيلم رخيص التكلفة، إستعداداً للإغلاق السينمات فى رمضان.. إحنا كمان بنستعد لموسم رمضاني مسلسلاتي ساخن.. إبقوا بصوا على #وحوي_يا_كايرو تجدوا ما يسركم.
