The wild Life : ثقافة تقبل الأخر
بنحب فى أفلام الأنيميشن قدرتها على مخاطبة عقليات وفئات عمرية مختلفه ومن شرائح أوسع من اللى بتخاطبها الأفلام العاديه… فى واقع الأمر إحنا بنعتبر مخاطبة الأطفال فن عظيم اللى يتقنه ويتمكن منه يقدر يخاطب أي فئة عمرية تانية براحته.
من إخراج فينسنت كيسيلوت وأداء صوتي من جورج بابيت و رون الين و جوي كامين بنشوف قصة مجموعة من الحيوانات على جزيرة مهجورة، مافيش على الجزيرة غيرهم.. وإزاي حياتهم بتتصف بالملل والرتابه لحد ما بيزورهم على غير المتوقع شخصية جديدة هى شخصية روبنسون كروزو، واللى بيغير حياتهم بوصوله وبيبدأ يفتح عينهم على حاجات جديدة مكانوش عارفينها قبل كده.
الفيلم بيشجع الكبار والصغار على فضيلة الإستكشاف والبحث وراء كل شىء، ومحاولة إكتشاف أمور جديدة فى حياتنا يوم بعد يوم، وعدم الإستسلام للملل والرتابه، وكلها أمور إحنا محتاجين فعلاً نتعلمها فى المنطقة العربية بشكل عام وفى مصر بشكل خاص، لكن نعتقد إن رسالة الفيلم ماوصلتش بقوة خاصة مع ضعف الإقبال عليه على حساب فيلم أنيميشن أخر هو Angry Birds واللى نقدر نقول إنه سحب البساط من تحت أقدام فيلمنا.
على الرغم من بساطة الموسيقى التصويرية إلا إنها تركت بداخلنا إحساس جميل بالراحه والإنسجام أثناء متابعة الفيلم، وده المطلوب بالظبط من الموسيقى التصويرية هو إنسجامها مع أحداث الفيلم مش مجرد إنها تكون خلفية موسيقية للأحداث والسلام.
على الرغم من بعض المشكلات فى التحريك والمؤثرات الخاصة إلا أن الفيلم يعتبر مقبول فيما يتعلق بالأمور دي، طبعا مش هايوصل لنفس درجة أفلام (بكسار) مثلاً لكن بيظل قادر على تقديم شخصيات بتتحرك بإنسيابية وسهولة أمام الكاميرا وده يحسب للفيلم.
The wild Life مش أفضل فيلم أنيميشن ممكن نشوفه، لكنه فيلم هادىء وكوميدي وقادر على إضافة شىء فيما يتعلق بثقافة تقبل الأخر والإنفتاح على الإستكشاف والمعرفة.
