I Am Wrath : أكشن خفيف وحبكة ممله

تيمة الافلام القائمة على وجود شخصية اساسية طيبة ومانعرفش حاجه عن ما سها بتنتمي لعالم مظلم وبتمتلك خبرات لا يمكن الاستهانة بيها فى عالم القتال وتبادل اطلاق النار والتعامل مع المجرمين.. الفكرة دي بحد ذاتتها شوفناها فى افلام كتير زي taken اللى بيحكي عن اب بيعمل فى المخابرات سابقا وبيضطر يستعيد خبراته علشان يلاقى الناس اللى خطفت بنته، او حتي فيلم John wick واللى بيعرض انتقام مجرم تائب سابق من الناس اللى بتحاول تدمر حياته. فيلم النهرده بينتمي لنفس النوعية وان كان مستواه الفني اضعف بكتير من الافلام دي.

من بطولة جون ترافولتا و كريستوفر ميلوني ومن اخراج تشاك راسل، بنشوف قصة مجرم سابق بيحاول يعيش حياته من جديد بنظافة وحياديه، الا ان زوجته بتتعرض للقتل امام عينيه، الامر اللى بيجبره على العودة من جديد لأيام (الشقاوه) علشان ينتقم من قتلتها، فقط علشان يكتشف ان قتلها كان له ابعاد اكبر وان الموضوع مكانش مجرد قتل من اجل السرقه.

النصف الاول من الفيلم بيمر فى سرد الاحداث بدون اكشن، يمكن شوفنا مشهد واحد او اتنين فقط اللى كان فيهم اكشن فى الفيلم، ومستوي الاكشن كان متذبذب مابين مشاهد قتالية عنيفه وقوية ومتميزة، ومابين قفلات المشاهد واللى حسينا انها غير منطقية وسريعه.. زي مثلا مشهد المعركة اللى بيصاب فيها صديق ستانلي فى قدمه، فقط لتبرير عدم قدرته على مطاردة المتهم الرئيسي فى الفيلم.

الموسيقي التصويرية مكانش لها اي دور فى الفيلم.. كانت هاديه اكتر من اللازم وغير مؤثره بالمره، والحقيقه ان جمهور النوعية دي من الافلام مش بيكون مهتم بالموسيقي بقدر اهتمامه بالاحداث نفسها. كمان الديكورات كانت محتاجه شغل اكتر من كده وحسنا ان الديكورات كانت شبه بعضها بدرجه كبيره.

I Am Wrath فيلم اكشن خفيف بحبكه ممله بعض الشىء ومشاهد الاكشن لم تنقذ الفيلم من شعورنا بالملل وبإن الفيلم متوسط الجوده والتكلفه.