رمضان 2016 : الأكشن والغموض يسيطران
بما أننا قربنا من نهاية شهر رمضان الكريم، وبما إننا نقدر دلوقت نقول إن عندنا شبه تصور لشكل الدراما الرمضانية النهائية، مع دخول المسلسلات الرمضانية فى طورها النهائى وبداية الإستعداد لنهاية المسلسلات فى اليوم الأخير من الشهر الكريم.. لازم نلفت النظر لظاهرة سيطرة مسلسلات الأكشن والغموض والرعب على باقى أنماط الدراما، على العكس من مسلسلات رمضان فى سنين ماضية.
لاحظنا فى السباق الرمضاني فى السنين اللى فاتت ظهور مسلسلات زي سلسلة المسلسلات اللى قدمها الفنان يوسف الشريف زي إسم مؤقت و رقم مجهول و الصياد و غيرها من المسلسلات.. وفى رأينا إن نجاح الأعمال الدرامية دي شجع صناع الدراما على استكشاف تيمات جديدة كان محظور عليهم دخولها، وكانت مقتصرة على الأفلام بس، زي الأكشن والغموض والتشويق والإثارة.
القيصر.. سقوط حر
أول المسلسلات اللى بتعتمد على الأكشن والتشويق هو مسلسل القيصر من بطولة يوسف الشريف، وبيحكي عن عالم الجماعات التكفيرية والجهادية ومحاولة جهاز الأمن المصري ايقاف أحد الجماعات الأرهابية عند حدها بمساعدة شاب مجهول الهوية.
مسلسل سقوط حر هو كمان يعتبر مسلسل فيه جزء كبير من الغموض والرعب النفسي من خلال قصة سيدة بتقتل زوجها وأختها وبيتم ايداعها مستشفى الأمراض العقلية للكشف على قواها العقلية بعد إكتشاف أصابتها بمرض نفسى أدي لارتكابها الجريمة الصعبة دي.
المسلسل بينضم لفئة مسلسلات الغموض وبيقدم فى حلقاته الأخيرة Twist مهم مش عاوزين نحرقه على متابعي المسلسل.
ونوس.. الخانكة
وبما اننا بنتكلم عن الرعب النفسى، لازم نتكلم عن مسلسل الخانكه واللى بيحكي عن مدرسة بتتعرض لحادث تحرش وبتحاول تحصل على حقها فى ظل وجود ناس اصحاب نفوذ فى الدولة بيحاولوا يمنعوها من الحصول على حقها.
اما مسلسل ونوس فا ساب الجزء بتاع الأكشن والضرب وبيتناول عالم الرعب النفسى والفلسفة القائمة على رحلة الصراع بين الشيطان والإنسان من خلال صراع ياقوت (نبيل الحلفاوي) ضد ونوس (يحيي الفخراني) اللى بيقدم أداء هو الأفضل فى 2016 من وجهة نظرنا.
جراند أوتيل.. الأسطورة
ولسه مع محطة الغموض والإثارة مع جراند أوتيل.. المسلسل اللى بيرجع بينا للماضى وبيورينا قصة تشويق واثارة عن محاولة شاب (عمرو يوسف) العثور على أخته المفقودة بعد حادث طردها من فندق (جراند أوتيل) فى أسوان… المسلسل بيمتاز بقدرة صناعه على خلق أحداث جديدة مثيرة جدا وعمل Twist أكتر من مرة فى السيناريو على مستوي حلقاته، الأمر اللى بيخليه مسلسل تشويق واثارة باقتدار.
بعيدا عن الإثارة بنشوف مسلسل الأسطورة، واللى يعتبر مسلسل أكشن وضرب بأكتر من كونه مسلسل تشويق وأثارة، عن قصة أخين توأم بيحاول واحد فيهم انه يلتحق بالنيابة، لكن السيرة السيئة للأخ التاني بتمنعه من الوصول لهدفه.
الأسطورة ممكن نعتبره المسلسل الأكثر دموية وتوحشا فى رمضان، بمشاهد اطلاق نار واشتباك يدوي ومطاردات صعبة ومرهقة.
سبع أرواح.. الميزان
مسلسل سبع أرواح قدر يجمع بين الأكشن والتشويق من خلال رحلة ظابط شرطه بيحاول يوصل فيها لمجموعة من المجرمين المتورطين فى اعدام رجل اعمال شهير بعد الصاق تهمة قتل فنانة شابه به، خالد النبوي اللى بيلعب دور ظابط الشرطه بيكتشف ان رجل الاعمال اللى هو قدر بتحرياته يوصله لحبل المشنقة برىء لان الفنانة الشابة لسه عايشه!
الميزان اختار مدخل جديد للتشويق والاثارة من خلال عالم المحاماة والكلام عن العدالة من خلال قصة بتدور فى عالم الجريمة والمحاكم واجراءات التقاضى والقبض والتفتيش، وغيرها من أساسيات عالم المحاماه من خلال قصة المحامية غاده عادي واللى بتحاول توصل للحقيقة فى أحد القضايا اللى بتتولاها.
ده كان عرض مختصر لأهم الأعمال اللى فيها أكشن وتشويق وأثارة فى رمضان 2016 وزي ما أحنا شايفين الأكشن والغموض والإثارة هم المسيطرين على الأعمال الدرامية فى 2016 فى عدد كبير جدا من الأعمال الدرامية المعروضة فيها.. هل السيطرة دي ها تستمر حتي رمضان 2017؟ شاركونا النقاش.
