رامز بيلعب بالنار: هل بنشوف الموسم الأخير لرامز جلال؟!

أعزائي القراء على كل تابلت أعزائي القراء على كل تليفون وكمبيوتر، أهلا بكم فى نقد جديد لبرنامج من برامج رامز جلال.. إتكلمنا قبل كده عن رامز ثعلب الصحراء و رامز واكل الجو وفى كل مرة بنقعد نقول ونعيد ونزيد لحد ما ريقنا ينشف، ورمضان يخلص وييجي رمضان جديد ونشوف برنامج جديد من برامج رامز جلال، وفى كل مرة بيحقق أعلى نسب المشاهدة.

الموسم ده الموضوع اختلف بعض الشىء، يمكن بسبب القضية اللى رفعتها بنت متضررة من برنامج رامز جلال لإنها كانت ضحية أحد الحرائق، وحست بإهانة وتقليب للمواجع بسبب جملة رامز جلال “إحساس جميل لما تشوف واحد بيولع قدامك” وده خلاها تتجه للقضاء وترفع قضية على البرنامج وعلى رامز.

البرنامج زي كل سنة بيبدأ بتتر متصور على كروما خضراء –لتركيب الخدع- لرامز جلال فى مواقف كلها ديناميت وقنابل ومتفجرات، بعدها بيبدأ البرنامج برامز وهو بيقدم الضيف من خلال استخدام عبارات أقل ما يمكن أن يقال عنها إنها عبارات مسيئة… العبارات نفسها بتزيد وبتتكرر أثناء دخول الضيف لمجال الخدعة واللى بتكون عبارة عن دعوة فى فندق فخم فى المغرب لحضور مؤتمر فني، بتتحول لمأساة مع نشوب حريق فى المبني، ثم بيدخل رامز كرجل مطافي علشان يزيد الطين بله ويغرق الضيف بمياه الإطفاء أو يجلس على ضهره ! –زي حلقة الخليل كوميدي- أو يتسبب للضيف فى إصابات زي حلقة علا  غانم، وغيرها من المواقف.

بعد كده بيصارح رامز جلال الضيف بحقيقة المقلب، ساعتها بيبدأ فاصل من الشتايم أو الضرب أحيانا زي ما حصل فى حلقة أمير كرارة اللى انهال بالضرب على رامز جلال وفريق عمل البرنامج نفسه.

ده ملخص للـ 30 حلقة من البرنامج واللى بنتوقع انها مش هاتتغير أبداً، لإن ده نفس سيناريو حلقات رامز جلال فى كل سنة فى رمضان، والحقيقة احنا مش قادرين نلومه قوي علشان كل سنه بيحقق أعلي نسب المشاهدة، بالتالي احنا مش قادرين ننسى دور المشاهد اللى بيحقق الترافيك وبيشجع رامز على تكرار برامجه كل سنه.

فى رأينا اننا محتاجين نكون أكثر صراحة مع نفسنا: هل احنا بنحب نشوف المشاهير على التليفزيون وهم (بيولعوا) او بيتعرضوا لمواقف سخيفة؟ هل رامز بيحقق رغبة نفسية دفينة داخل كل واحد فينا انه يشوف نجمه المفضل اللى بيشوفه دايما فى السما وهو بيتبهدل او بيتعرض لمواقف ممكن أي شخص فينا يتعرض لها؟ ولا إحنا بنكره النوعية دي من البرامج ومش حابين نشوفها؟ فى الحالة دي يبقى غيروا مؤشر القناة عن رامز جلال، علشان ما يحققش أعلي نسب مشاهدة ونضطر نشوفه فى موسم جديد.

يعرض علي: ال بى سى انترناشيونال 5 ص

ام بى سى مصر: 8 ص

ام بى سى : 9.30 ص