أفلام مقتبسة عن قصص حقيقية فى 2016.. ماينفعش تفوتها!
الأفلام يا أصدقائنا أنواع… أفلام ينفع نتفرج عليها بنصف ذهن ونصف انتباه… أفلام ممكن نتفرج عليها واحنا بنلعب كاندي كراش.. وأفلام تانيه لازم لما نشوفها شغاله نسيب كل حاجه فى ايدنا ونتفرج عليها باهتمام… نسمع كل كلمة بإنصات شديد.. علشان الأفلام دي مش بس بتورينا قصة معينة بتحصل فى زمن ما… القصص دي مقتبسة أيضاً عن قصص حقيقية وأحداث واقعية… يعني كل فيلم منها بيحمل جزء من بصمة ناس حقيقية عاشت وأثرت فى مجتمعاتنا، وأصبحت قصة حياتها تستحق تتحكي فى فيلم مستقل.
هانعرض لكم هنا مجموعة من الأفلام اللى حققت نجاح كبير فى 2016 وكانت مقتبسة عن قصص حقيقية.. يمكن قصتكم أنتم نفسها تتحول لفيلم فى يوم من الأيام… مين عارف؟!
The Man Who Knew Infinity
من إخراج وتأليف مات براون وبطولة ديف باتل و جيرمي ايرونز و مالكون سينكلير بنشوف فيلم مقتبس عن قصة حقيقية، عن حياة عالم الرياضيات الهندي المعجزة (رامانوجان)، وازاي بدأت حياته فى مدينة مدراس فى الهند كشاب فقير متزوج حديثاً ومش عارف يصرف على زوجته لفقره الشديد، وازاي مقدرش ينسى حلمه انه يقدم اكتشافات جديدة فى مجال الرياضيات وطرق اثبات النظريات الرياضية المختلفة، لكنه بيقرر ينسى كل شىء مؤقتا ويلتحق بوظيفة حقيره فى الهند.
بتستمر الأحداث وبنشوف (رامانوجان) لما بيسافر انجلترا بناء على دعوة من أحد أساتذة الرياضيات، وازاي ان فكرة السفر بحد ذاتها كانت مخالفة للتعاليم الدينية الهندوسية، وأزاي اثر سفره على العلاقة بين زوجته وبين والدته، لكن رامانوجان كان عنده حلم كبير.. مش هايسكت قبل ما يحققه.
على الرغم من فكرة الحلم وتحقيقه ممكن تكون فكرة مبشرة وجميلة، الا ان النمط العام للفيلم كان اكثر ميلا للجانب المأساوي والحزين، والحقيقة اننا لما قرينا قصة رامانوجان الحقيقية، عذرنا القائمين على الفيلم…الصراحه الراجل عشان حياه قصيرة حزينه كئيبة وتعرض لكتير من الاهانات العنصرية من البريطانيين اللى مش متقبلين فكرة ان حد من أحد مستعمراتهم يتفوق عليهم فى مجال الرياضيات.
رامانوجان الحقيقي إسمه بالكامل سرينفاسا أينجار رامانجن وعاش من 1887 حتي 1920 ويعتبر من أشهر العلماء فى مجال الرياضيات البحته فى العالم، وعلى الرغم من الفترة القصيرة اللى عاشها، إلا أن إسهاماته واكتشافاته فى مجال الرياضيات والمعادلات اللى قدر يكتشفها ويطورها سابت أثر كبير على الرياضيات كعلم.
Snowden
من الهند إلي امريكا.. ومن الماضى السحيق للماضى القريب.. فيلم snowden مقتبس عن القصة الحقيقية لظابط المخابرات الأمريكية السابق (إدوارد سنودن) واللى خدم فى المخابرات فى فترة حكم جورج بوش وبداية حكم أوباما، وقرر إنه يفضح برامج التجسس اللى بتستخدمها المخابرات الأمريكية للتجسس على الشعب الأمريكي للصحافة.. الأمر اللى تسبب فى ضجة ضخمة على المستوي السياسى والإجتماعي والدولي.
الفيلم من إخراج أوليفر ستون وتأليف لوك هاردينغ و أناتولي كوتشيرينا ومن بطولة جوزف جوردن ليفيت و لورا بويتراس و جيلن جرين والد بمشاركة نيكولاس كيدج و شالين وودلي.
إدوارد سنودن الحقيقي كان شغال على برنامج سري تابع للمخابرات إسمه (بريسم).. البرنامج قادر على اختراق كل حسابات التواصل الإجتماعي والبريد الإلكتروني، والتجسس على أجهزة المحمول والابتوب والكمبيوتر الخاصة بأي شخص فى العالم، وأختراق أي موقع فى العالم… من الأخر كده البرنامج كان بيسقط حق أي إنسان فى التمتع بأي قدر من الخصوصية.. وده اللى استفز (سنودن) لفضح البرنامج والحكومة الأمريكية.
حتي اليوم بيتم النظر لسنودن من الولايات المتحدة كجاسوس، وكموظف ذو رتبة عالية خان الأمانة وسرب أسرار بلاده، أما محبى سنودن بيشوفوه كمناصر لحقوق الإنسان وحق الإنسان فى التمتع بالخصوصية، وبيشوفوه إنسان جرىء قدر يفضح واحدة من أقوي المؤسسات الأمنية فى العالم ويخرج بسلام.
سنودن حاليا عايش فى روسيا بعد طلبه اللجوء السياسى هناك.. ولسه تصريحاته وظهوره فى الميديا بيثير مشكلات كبيرة.
Hacksaw Ridge
الفيلم مقتبس عن حياة ديزموند دوس، الشاب الأمريكي الرافض لفكرة التجنيد الإجباري والمشاركة فى قتل الأبرياء خلال الحروب، لكنه بيتطوع للخدمة فى الحرب العالمية الثانية كمسعف فى الجيش الأمركي، وعلى الرغم من إنه لم يطلق رصاصة واحدة خلال الحرب ولم يحمل سلاح، إلا أنه أنقذ كتير من الأرواح واستحق وسام الشجاعة واحترام الجيش والمجتمع الأمريكي.
ديزموند دوس الحقيقي من مواليد سنة 1919 ومات سنة 2006 وبيعتبر بطل لأنه قدر يجمع بين رغبته الشخصية فى عدم المشاركة فى الحرب وعدم المشاركة فى قتل الناس، وفى نفس الوقت ما هربش من تطبيق القانون وقدر يعمل كمسعف وينقذ حياة مئات البشر.
Bleed for this
الفيلم المقتبس عن قصة حقيقية بيحكي قصة حياة الملاكم فيني بازينزا، واللى بيحقق إنجازات متميزة فى مجال الملاكمة، ثم بيتعرض لحادث مروع بيكاد يفقد فيه حياته، وبيضطر للعيش بدعامات للرقبة تمنعه من تحريك رقبته علشان مايحصلوش انفصال فى الحبل الشوكي ويموت.
لكن على الرغم من الحالة الطبية الصعبة لـ(فيني)، وإن الدكاتره قالوا له إنه مش هايقدر يلعب ملاكمة تاني أبداً، إلا أنه استطاع استكمال تدريبه بالمخالفة لكلام الأطباء، واستعادة مكانته فى عالم الملاكمة تاني بعد فترة طويلة من الإنقطاع من أجل العلاج.
الفيلم من بطولة مايلز تيلر و أرون إيكهارت و كاتى ساجال و سياران هيندز و أماندا كلايتون و كريستين إيفانجليستا
فيني بازينزا الحقيقي من مواليد 1962 وقدر يحصد بطولة العالم فى الملاكمة للوزن الخفيف والخفيف المتوسط و السوبر متوسط.
الحادثة اللى تعرض لها بازينزا جعلته يصمم على تحطيم المستحيل والإستمرار فى التمرين على الرغم من خطورة ده على حياته، وكان بيستعمل بدروم المنزل اللى عايش فيه علشان يتدرب بعيداً عن أهله اللى لو كانوا عرفوا كانوا هايوقففوه عن هدفه.
قدر بازينز يعود من تاني لحلبات الملاكمة ويحقق انتصارات عظيمة… لكن أيضا سلوكة الغير منظبط دله فى مشاكل كبيرة وصلت للسجن أحيانا. لكن ده لا ينفي انه قدر يحقق قصة نجاح وصمود قوية.
Masterminds
وزي ما اتكلمنا على البطولات والناس اللى تحدت مشاكلها علشان تبقى أحسن.. برضو لازم نتكلم عن الأفلام الحقيقية القائمة على
