The Great Wall : رحلة فى أسرار الصين القديمة.
قبل لما نحكم على الفيلم –أي فيلم- سواء بالسلب أو الإيجاب لازم نعرف هو بيخاطب مين، وبيستهدف أي شريحة من المشاهدين، وعاوز يقدم إيه بالظبط وفى حدود ميزانية قدرها كام؟
فيلم The Great Wall اللى أخرجه يمو زانج وقام ببطولته مات ديمون و بيدرو باسكال و وليام دافو و تيان جينج و أندي لاو و نعمان آكار، الفيلم بيعتمد فى المقام الأول على الإبهار البصري ومشاهد القتال الصيني المختلفة والمتميزة.
الفيلم بيحكي عن سور الصين العظيم والأسرار اللى بتحيط بناؤه، ومحاولة مجموعة من العسكريين الصينيين التصدي لمحاولة ضخمة لغزو السور بتحصل كل فترة طويلة.
زي ما قولنا الفيلم بيعتمد فى درجة كبيرة من أحداثه على الإبهار البصري، والقائم على مشاهد الصراع والضرب بالمنجنيق وغيرها من المشاهد اللى بتخلى عين المشاهد مشدودة تماما للتفاصيل المختلفة.
الأداء التمثيلي كان أضعف من المؤثرات والخدع البصرية، وحسينا إن الإخراج إهتم بإظهار صورة جيدة على الشاشة على حساب توجيه أبطال الفيلم لتقديم أداء تمثيلي قوي، والحقيقة دي غلطة أصبحت شهيرة فى عالم صناعة الأفلام المعتمدة على الخدع السينمائية والجرافيكس وخلافه.
واضح أن الشريحة العمرية اللى بيتوجه لها الفيلم صغيرة نسبياً، بالتالى حسينا أن الموسيقى التصويرية لم يتم الإهتمام بها كفاية، لكن ده لا ينفي أن بعض المشاهد كانت مميزة على مستوي الموسيقى، لكن كنا نحتاج نسمع أكتر من المقطوعات الموسيقية الصينية الجميلة اللى بتثير المشاعر وبتحرك الشجن بداخلنا.
لكن على الرغم من ضعف الموسيقى النسبي، الديكورات كانت قوية ومتميزة، ونقلتنا بصرياً لعالم الصين فى العصور القديمة، ولأن مافيش حد عاصر الفترة دي فعلا، ده أعطي القائمين على ديكورات الفيلم مساحة واسعة للإبداع وتقديم أفضل ما عندهم.
ميزانية الفيلم كانت كبيرة وتم تخصيصها بالمقام الأول لصالح إنتاج صورة مبهرة، ومؤثرات خاصة قوية، لكن زي ما قولنا الأداء التمثيلي والموسيقي كانت محتاجه تكون أقوي وأكثر إبهارا وتميزا.
The Great Wall ننصح بمشاهدته بدون توقعات عالية مسبقة، لو شوفتوه بغرض المتعة والمتعة فقط، ممكن يكون فيلم ممتاز فى الحالة دي.
