Miss Sloane : ممكن تعمل ايه علشان توصل؟!
السياسة الأمريكية، واحدة من أشرس حلبات الصراع السياسي فى العالم، والأعمال اللى تناولت الفكرة دي كتيرة ومتنوعة، يمكن أشهرها على الإطلاق مسلسل House Of Cards واللى بيحكي عالم النفوذ والقوة والسيطرة على الإنتخابات الأمريكية من خلال رحلة واحد من أشهر وأقسي رجال السياسة فى الولايات المتحدة وهو (فرانك أندروورد).
فيلم اليوم بيحكي عن إليزابيث سلون السياسية الأمريكية القاسية، واللى متعوده تكسب كل معاركها السياسية بكل طريقة ممكنه، لكن لما بتواجه أقوي خصم فى حياتها السياسية بالكامل، بتتعلم –ربما للمرة الأولي- فداحة التمن اللى ممكن تدفعه علشان توصل للهدف اللى عاوزه توصل له.
مش عاوزين نحرق عليكم الأحداث أكتر من كده، علشان تشوفوا أبطال الفيلم وهم جيسيكا تشاستين و دوجلاس سميث و مايكل ستولبيرج و جيك أسي والفيلم أيضاً من إخراج جون مادن عن قصة وسيناريو وحوار جوناثان بيريرا.
الأداء التمثيلي لمعظم أبطال الفيلم كان ضعيف، وممكن نقول انه باستثناء جيسكا تشاستين كانت باقي الأدوار التمثيلية ضعيفة ومش فى المود، وده يمكن بسبب ضعف الإسلوب الإخراجي، لأننا تعلمنا لما نلاقي مجموعة كبيرة من الممثلين مش عارفه تقوم بأدوارها بشكل جيد بيكون العيب غالباً من الإخراج.
المميز فى الفيلم كان الحوار اللى كان واضح إنه متعوب عليه، والحوار كانت ميزته انه مؤثر وقوي وحاسم، لكن فى نفس الوقت حسينا ان بعض الجمل الحوارية مش من المستخدمة فى الحياة اليومية التقليدية للبشر، لكن كان ممكن نتغاضى عن العيب ده أمام باقى مميزات حوار الفيلم.
الموسيقى التصويرية كانت قوية ومؤثرة فى بعض المشاهد، لكن بناخد على صناع الفيلم ان الموسيقي مكانتش قوية فى كل المشاهد، وبعض المشاهد كانت محتاجه تكثيف أقوي من الموسيقي أو استخدام مختلف وأكثر احترافية لأدوات العزف.
Miss Sloane من نوعية الأفلام اللى مش محتاجه كلام كتير.. كمان من الأفلام اللى مابتقبلش الحلول الوسط..إما هاتحبوها جدا وتعيشوا أحداثها، أو تحسوا ناحيتها بالكراهية وإنكم مش عارفين تكملوا الفيلم للنهاية… ياتري انتوا شايفين ايه؟!
علشان تبقى عارف: الفيلم حصل على تقييم 5.5 من 10 على موقع IMDB لتقييم الأفلام.. وشارك فى التقييم حوالى 2000 مستخدم للموقع.
