أجمد 5 سينمات فى كايرو! ٢٠١٦
مهما انتشر التحميل من الإنترنت والمشاهدة فى التليفزيون، هاتظل السينما هى المكان المفضل لمحبي مشاهدة الأفلام العربية والأجنبية، وهتظل خروجة السينما واحدة من أحلي وأمتع الخروجات، واللى بتصلح للشتاء والصيف وفى أي وقت ولأي مجموعة من الناس…
فى الموضوع ده كايرو360 هاتقول لكم أجمد 5 سينمات فى كايرو… عناوينها وسبب اختيارها كسينمات جامدة… ومعلومات تانيه كتير هاتعرفوها وانتوا بتقروا الموضوع.
- أمريكانا بلازا سينما
مجمع سينمات أمريكانا بلازا بيقع داخل المول اللى بيحمل نفس الإسم فى أكتوبر.. على بعد دقيقة أو دقيقتين من هايبر وان أكتوبر.
المجمع يعتبر واحد من أهم وأكبر مجمعات السينما فى كايرو.. السينما موجودة فى مول أمريكانا بلازا، ونقدر نقول إن السينما هى النقطة المحورية فى المول بالكامل.. يعني بنشعر بمجرد دخولنا المول كله بيعمل فى خدمة السينما فى المقام الأول.. سواء المطاعم أو الكافيهات كلها موجودة للإستفادة من زبائن السينما بالمقام الأول.
بالإضافة لعدد القاعات الكبيرة فى السينما، بتمتاز السينما بوجود قاعة الـ IMAX الوحيدة فى جمهورية مصر العربية وده بيخليها واحدة من أهم السينمات فى مصر لمحبي مشاهدة الأفلام بالتقنيات الحديثة وعلى أضخم شاشة فى مصر.
بالإضافة للأيماكس السينما فيها قاعات “سيني كومفورت” وهى قاعات مجهزة بمقاعد أكبر ومساحات أوسع بين المقاعد لتوفير تجربة مشاهدة أفضل للمشاهدين.
كل اللى فات ده لو أضفنا له التعامل الإحترافي لفريق عمل السينما، ومديرين القاعات المحترفين والودودين الى أقصي درجة، والمهتمين طوال الوقت بسماع اقتراحات وشكاوي المشاهدين والتعامل معها بسرعة وكفاءة مهما كانت درجة ازدحام السينما.. كل الأمور دي بتخلينا نقول إن مجمع أمريكانا بلازا هو الأفضل والأقوي فى القاهرة.
- سينما سيتي ستارز
مجمع سينمات سيتي ستارز هو كمان واحد من أحسن مجمعات السينما فى كايرو… عدد قاعات ضخمة موزعة بين قاعات الـVIPفى الدور الأول من المول الشهير الموجود فى مدينة نصر.. قاعات الـVIP بتعتبر من أفخم قاعات السينما فى كايرو… الكراسى بتاعتها قمة فى الراحة، ومسموح فيها باصطحاب الأكل.. وبتقدم تجربة استثنائية لمحبي الفخامة والراحة أثناء مشاهدة أفلامهم المفضلة.
أما القاعات العادية فا موجودة فى الدور الخامس فى المول، وبتمتاز السينما بإدارة متميزة وفريق عمل متعاون و مبتسم للمشاهدين دائماً حتي فى أيام الضغط والأجازات.
من أكتر الحاجات اللى بتخلينا نعتبر مجمع سينمات سيتي ستارز من أحسن مجمعات السينما فى كايرو إنه موجود بالأساس داخل مول عملاق ومتميز، يعني مش هاتشيلوا هم الأكل والتسوق وحتي ركنة العربية.. وكل ده فى مدينة نصر اللى بتعتبر واحده من أكتر المناطق حيوية فى كايرو.
- سينما بوينت 90
من مدينة نصر إلي التجمع الخامس.. وتحديداً أمام الجامعة الأمريكية الجديدة.. واحدة من أحدث وأجمل مجمعات السينما فى كايرو.. على الرغم من حجم المجمع الصغير مقارنة بباقى مجمعات السينما فى كايرو، إلا أن حداثة المكان ونظافته الشديدة والتعامل الإحترافي والمهذب فى نفس الوقت من فريق العمل، بيخلي تجربة مشاهدة السينما فى بوينت 90 لا تفوت.. خاصة وأن عدد القاعات وتوزيع الأفلام عليها بيضمن عدم تفويت أي فيلم بيتم عرضه خلال الإسبوع السينمائى.
لو كنت فى التجمع الخامس أو قريب من هناك… لا يمكن تفوت تجربة بوينت 90 بحال من الأحوال!
- سينما الزمالك
منطقة الزمالك والمعادي والعجوزة… وباقي مناطق القاهرة بعيداً عن المدن الجديدة ووسط البلد، بتاعني فى واقع الأمر من قلة عدد السينمات فيها… منطقة الزمالك تحديداً كانت واحدة من الأماكن اللى تقريبا مافيهاش سينما على الإطلاق… علشان كده فرحنا جداً لما عرفنا خبر افتتاح سينما الزمالك فيها كواحدة من أحدث السينمات فى كايرو.
السينما بتقع بالقرب من ساقية الصاوي وده بيكسبها طابع ثقافي محبب.. كمان سهل على الناس اللى بتتحرك بالمواصلات إنها توصل للسينما بسهولة.. لكن بنعيب على السينما إنها بتعرض فيلم واحد فقط! على الرغم من فخامة القاعة وجمالها لكن كنا نتمني عرض أكتر من فيلم وإن السينما يكون فيها أكتر من قاعة.. لكن عزاؤنا هنا إن سينما الزمالك بتعتبر نفسها مكان ثقافي أكتر منه مكان ترفيهي والسلام.
بما إننا بنتكلم عن أحدث سينما فى كايرو فا لازم نشيد بنظام السينما ونظافتها الرائعة..الفخامة المتميزة فى السينما والأبواب اللى بتفتح بالكهرباء وطبعا التعامل الأكثر من رائع من فريق العمل وخصوصا المسئولين عن حجز التذاكر.
- داون تاون سينما
ماينفعش نختم كلامنا عن أجمد سينمات كايرو بدون ما نتكلم عن منطقة وسط البلد.. والحقيقة إن سينمات وسط البلد فى معظمها حالها مش كويس أبداً.. سواء على مستوي الكفاءة أو تنوع الأفلام أو حتي جودة أجهزة العرض.. لكن سينما داون تاون فى 8 عماد الدين تعتبر واحدة من أفضل السينمات فى منطقة وسط البلد.
السبب الأول فى اختيارنا لداون تاون هو تنوعها فى الأفلام اللى بتعرضها مابين الأفلام الأجنبية والعربية.. وثانياً بسبب المعاملة المتميزة لفريق عمل السينما وخاصة المسئولين عن حجز التذاكر.. وكل الأسباب دي بتخلينا نرشح داون تاون كأفضل سينما فى منطقة وسط البلد لمحبى السينما وأفلام السينما.
