Desierto : العنصرية فى أسوأ صورها.
Desierto بالأسبانية تعني الصحراء… والناس اللى زارت الصحاري قبل كده كلهم بيحكوا إن تجربة الحياة فى الصحراء بتغير حياتهم للأبد.. الصحراء بتعلم الناس الصبر والهدوء.. بتعلم الناس التأمل والتفكر فى الدنيا من حوالينا… لكن أحداث فيلم Desierto كانت بعيدة تماما عن كل ده!
الفيلم من إخراج جوناس كوارن وبطولة ديبجو كاتانو و جايل جارسيا برنال و جيفري دين مورجان وبيحكي عن مجموعة من المهاجرين الغير شرعيين، واللى بيحاولوا يتسللوا للولايات المتحدة من خلال الصحراء الأمريكية المكسيكية.
المجموعة بتضطر للإنقسام لفريقين علشان تقلل مخاطر عملية الهرب، خاصة بعد عطل السيارة اللى كانت بتنقلهم، لكن حظهم بيوقعهم فى رجل عنصري مسلح ببندقية قناصة وكلب صيد… وبتبدأ عملية مطاردة شرسة بينه وبينهم.
بنعيب على سيناريو الفيلم إنه لم يوضح الدافع الأساسى وراء عملية الصيد، والعنصرية وحدها لم تكن كافية لتفسير أفعال الصياد الأمريكي، لكن أحسن ما فى الفيلم إنه مش بيتركنا لثانية واحدة من الملل أو عدم القدرة على متابعة الأحداث.. بل شعرنا إننا فى نفس موقف الضحايا وبنعيش اللى بيعيشوه بالظبط.
الكاميرا كان لها نصيب الأسد من بطولة الأحداث.. واعتمد الإخراج عليها بشكل كبير سواء فى مشاهد استعراض الطبيعة والصحراء الممتدة، أو حتي فى مشاهد المطاردات اللى قدرت الكاميرا ترصدها أحيانا كعين صقر بتبص على المشهد من أعلي، أو كشريك للشباب فى محاولة الهرب من طلقات الصياد.
الأداء التمثيلي كان متميز خاصة جيفري دين مورجان و جيل جارسيا بيرنال، وكان من الواضح حجم المجهود البدني الشاق اللى قام به الممثلين علشان يقدموا لنا فيلم واقعي بيدور فى منطقة صحراوية صعبة.
Desierto بيثبت إن صناعة التشويق مش محتاجة مؤثرات ضخمة أو ميزانيات بالملايين… كل اللى محتاجينه قصة مختلفة وجديدة وقوية، وأداء تمثيلي قادر على اقناعنا… ولا إنتوا ايه رأيكم؟!
