Blood Father : فيلم ممل رغم محاولة التشويق
فى البداية وقبل الكلام عن الفيلم، عاوزين نسجل اعتراضنا على الإسلوب السىء فى التعامل اللى تعرضنا له من سينما هيلتون رمسيس، واللى تعنتوا معانا ورفضوا عرض الفيلم وأجبرونا على مشاهدته فى سينما تانيه.. القائمين على صناعة السينما فى مصر بيحاولوا بكل جهدهم إنهم يجذبوا المشاهدين لمشاهدة الأفلام فى دور العرض بدلاً من القرصنة، لكن واضح إن إدارات بعض السينمات (الكبري) فى كايرو مش مقدرة المسئولية دي!
نرجع لفيلمنا.. على الرغم من محاولة خلق حالة من التشويق والإثارة والأكشن.. ومشاهد تبادل إطلاق النار ومطاردات السيارات و الدراجات البخارية.. إلا إننا مانقدرش ننكر حالة الملل الشديد اللى اصابتنا أثناء مشاهدة Blood Father للنجم ميل جبسون… هانستعرض مع بعض سبب الملل من خلال أحداث الفيلم ونقدنا له.
Blood Father من إخراج جان فرانسوا ريشت عن رواية بيتر كريج، وكتب لها السيناريو أندريا بيرلوف.. الفيلم بيحكي عن أب بيحاول يتعافى من إدمان الكحول بعد سنين قضاها فى السجن، وبيحاول يلتزم بشروط إطلاق سراحه المشروط من السجن علشان ما يرجعش للسجن تاني.
كل الأمور دي بتنقلب رأسا على عقب لما بتظهر بنت جيبسون المختفية بقالها فترة طويلة، وبتلجأ له لحمايتها من عصابة من الأشرار بتتورط معاهم البنت فى جريمة قتل أثناء المشاهد الإفتتاحية للفيلم.
على الرغم من قوة القصة إلا أنها مكررة، وسبق تقديم علاقة الأب والإبنة فى أفلام أكشن متميزة زي سلسلة أفلام Taken وللأسف ماقدرش صناع Blood Father يقدمولنا تنويع جديد على العلاقة دي أو حتي يقدموا لنا أبعاد نفسية جديدة فى العلاقة دي.
إخراج الفيلم اعتمد على محاولة خلق حالة من التشويق والإثارة من خلال خط سير الأحداث، وقدر يقدم مشاهد أكشن قوية ومختلفة ومبتكرة فى كتير منها، لكن فاته تقليص مساحات مابين مشاهد الأكشن، خاصة إنه ماقدرش يقدم فى المشاهد دي أي أبعاد نفسية أو أي تفاصيل تفيد الحبكة.. علشان كده حسينا بالملل.
الديكورات كانت واحدة من أهم عوامل الفيلم، واستغل صناع الفيلم التصوير فى المناطق الصحراوية الشاسعة علشان يقدموا عالم كامل من ابتكارهم، ودي كانت نقطة تميز مهمة جدا خلال أحداث الفيلم.. أما الموسيقي التصويرية فكانت باهتة وضعيفة جدا ومش على مستوي الفيلم إطلاقا.
ميل جبسون بيقدم أداء تمثيلي متوسط.. واضح جدا قدرته على العناية بجسده رغم تقدمه فى السن، لكن انفعالاته وقدرته على تقديم أداء تمثيلي كانت ضعيفة ومش على مستوي الأحداث اللى بتحصل فى الفيلم.. وكنا منتظرين منه أداء أفضل فى مشهد إكتشافه وجود بنته على سبيل المثال.
فى دور الإبنة المراهقة بتقدم إيرين موريارتي الدور بشكل جيد لكن نمطي وتقليدي ودون أي محاولة للتجديد أو إضافة بصمتها الخاصة على الدور والشخصية، أما ويليام اتش. ماسي فى دور صديق البطل فا قدم أداء متميز على الرغم من تقدمه الكبير فى السن واللى ظاهر على وجهه بشكل واضح.
Blood Father مش أحسن فيلم أكشن شوفناه.. لكن ممكن تقضوا معاه وقت جيد لو كنتم مش بتزهقوا بسرعة.
