حملة فريزر : قصة أفضل وكوميديا أقل

هايكون لنا عودة مطولة مع تقديم الثلاثي الشهير أحمد فهمي و هشام ماجد وشيكو لأفلام منفصلة عن بعضهم… عندنا فى موسم عيد الأضحي فيلم حملة فريزر من بطولة هشام ماجد وشيكو وفيلم كلب بلدي من بطولة أحمد فهمي… هانستني لما الإيرادات تتعرف ونشوف رأي الجمهور فى الفيلمين ونتكلم عن ده بالتفصيل.. دلوقتي هانتكلم بالتفصيل عن حملة فريزر.

بعد ثورة 25 يناير كان فى كلام كتير عن تحكم الدول الغربية فى الطقس والمناخ، واضح إن الموضوع ده شغل صناع القائمين على الفيلم وخلاهم عاوزين يقدموا حاجه عن الموضوع ده.. علشان كده الفيلم بيحكي عن تحول طقس مصر من الإعتدال للبرودة القارصة، الأمر اللى بيخلي جهاز الأمن يرسل فريق للعثور على الجهاز ووقف التجربة اللى بتقوم بها أحد الدول ضد مصر… من هنا بنبدأ نتعرف على الفريق اللى بيتم ارساله تحت مظلة العمل على أحد الأفلام.

المخرج شادي يسري والمؤلف ولاء شريف –بالتعاون مع هشام ماجد- بيقدمولنا فريق مكون من سراج الدين بعتذر المخرج الفني والفنانة نسرين أمين و مديح البلبوصي أو شيكو واللى بيقوم بدور ممثل مغمور بيحاول بتعامل بعنجهية وغرور.

الأداء التمثيلي للأبطال كان متميز ونخص بالذكر نسرين أمين واللى اكتشفنا فيها حس كوميدي لا يقل عن ممثلات الأفلام الكوميدية الثقيلة، بيومي فؤاد كمان قدم أداء متميز وإن كان أقل درجة من أعماله السابقة لكن يظل فى خانة الجيد جدا.. أما أعضاء الثلاثي شيكو وهشام ماجد فا ماقدروش يتخلوا عن صديقهم الثالث بدون خسارة مساحة كبيرة فى الكوميديا… مساحة حاولوا تعويضها بشدة لكن فشلوا فى النهاية فخرج الفيلم فى مستوي متوسط.. لا نقدر نقول عليه فاشل ولا نقدر نقول إننا ضحكنا بنفس القدر اللى ضحكناه فى أفلام الثلاثي.

مشكلتنا الأساسية مع الكوميديا فى الفيلم كانت فى إنه كان ممكن يكون فيه أفضل من كده.. كان ممكن  نضحك أكتر ونحس بمواقف كوميدية أكتر من كده.. ولو ده فيلم من بطولة ناس تانيه غير فريق الثلاثي كان ممكن الأمر يعدي.. لكن مع الثلاثي.. اتعودنا على جرعة كوميديا أكبر.

على الرغم من عدم تركيزنا مع الموسيقي والديكور فى الأفلام اللى بتقدم الكوميديا من أجل الكوميديا، لكن (حملة فريزر) قدر يورينا مشاهد جميلة جدا لكرواتيا، وكان واضح إن فيه جهد وتعب كبير فى إخراج كتير من المشاهد بصورة متميزة، وكان واضح جدا البذخ الإنتاجي فى الفيلم واللى انعكس علينا كمشاهدين بإحساس عام بالفخامة والراحة فى المشاهد اللى تم تصويرها.

الناس اللى عاوزه تضحك وتنبسط بشكل عام فى العيد هايلاقوا الفيلم ممتاز.. لكن اللى داخل الفيلم علشان نفس جرعة الكوميديا للأفلام السابقة للثلاثي المتميز… ننصحه يفكر مرتين.