تحت الترابيزة : لا جديد من محمد سعد
تصريحات كتير قريناها مؤخراً عن إتجاه محمد سعد فى فيلمه الجديد للإبتعاد عن نمط الشخصيات اللى قدمها قبل كده، وإنه هايقدم شىء جديد يخرجه من السقطة الكبيرة اللى تعرض لها برنامجه الكوميدي الأخير (وش السعد).. إلا إن للأسف مافيش حاجه من دي حصلت وقدم سعد فيلم شبه باقي أفلامه السابقة كلها، المختلف المرة دي كان فى قلة مساحة الكوميديا فى مقابل زيادة نسبة الإستظراف ومحاولات الإضحاك بأي شكل… إلا الشكل السليم!
من إخراج سميح النقاش وبطولة محمد سعد و نرمين الفقي ومنة فضالي وحسن حسني بنشوف قصة محامي رجال أعمال فاسدين بيتعرض لحادثة بتحولة لشخص تاني تماما، الأمر اللى المفروض ينتج عنه جرعة كوميدية كبيرة خاصة مع قيام محمد سعد بالدور، وسعد ممثل كوميدي ثقيل قدم للسينما قبل كده فيلم اللمبي اللى مش هاينساه المشاهدين بسهولة.. مشكلة سعد الأساسية هى إنه حصر نفسه فى النوعية دي من الأدوار… ومش قادر يخرج عنها.
أداء محمد سعد التمثيلي زي ما قولنا ما اختلفش كتير عن باقي الأداءات لشخصيات تانيه زي عوكل واللمبي وكتكوت وغيرها، وحاول سعد يعتمد على الكوميديا المأخوذة عن طريقة سير البطل بطريقة غريبة وكلامه بطريقة أغرب، وكلها حاجات مش جديدة على محمد سعد بل على العكس شوفناها فى أعمال كتيره له قبل كده.
إختيار منه فضالي كان غير موفق تماما لإنها ماقدرتش تشيل الدور كويس، لكن واضح إن كل المطلوب كان وجود عنصر نسائي فى الفيلم وترك مساحة الكوميديا كلها لأداء سعد اللى كان المفروض يعوض النقص فى باقي عناصر الإختيارات السينمائية.. ومع فشل سعد فى الكوميديا بشكل جديد أو مستحدث أصبح الفيلم بالكامل غير مضحك أو مسلي إطلاقاً.
حسن حسني كإختيار من فريق عمل الفيلم كان إختيار غير موفق لإن حسني أصبح كارت محروق وتم استخدامه فى ألف فيلم قبل كده.. لكن من الواضح إن فريق العمل كان مش عاوز يستعين بحد ممكن تحصل مقارنة بين أداؤه وبين أداء محمد سعد زي بيومي فؤاد مثلا أو أي حد من نجوم مسرح مصر واللى بيتم الإستعانة بيهم فى أدوار كتير فى الفترة الأخيرة.
فى فيلم كل هدفه الكوميديا صعب نتكلم عن دور الديكورات أو الموسيقي التصويرية، لكن لازم نقول إن الفيلم تم إنتاجه مالياً بشكل جيد وفيه صورة كويسة لكن لم يتم توظيفها لخدمة الكوميديا بشكل كبير.
ننصح الناس اللى بتفكر فى دخول (تحت الترابيزة) إنهم يفكروا هل بيحبوا محمد سعد كممثل فى المطلق؟ فى الحالة دي بس ممكن الفيلم يعجبهم. أما لو بتدوروا على فيلم كوميدي بشكل أفضل من كده ننصحكم بفيلم تاني.
