Cell : الخطر فى التليفون المحمول!
على الرغم من انتشار وسائل التقنية الحديثة زي الموبايلات ومواقع التواصل الإجتماعي وغيرها من الأمور فى حياتنا اليومية من وقت طويل، إلا أن إستغلال هوليود للأدوات دي لإنتاج أفلام رعب لم يتم إلا مؤخراً فقط، وفى رأينا ده يعتبر تأخر منهم لإستغلال حاجات بتحصل فى حياتنا اليومية إنها تتحول لأدوات رعب.
شوفنا قبل كده فيلم Unfriended عن كيفية تحول العلاقات الإجتماعية على شبكة الإنترنت لغول بيدمر حياتنا، وواضح إن فيلم Cell بيحاول يلعب على نفس الوتيرة لكن بشكل أقل نجاحاً وقدرة على التاثير للأسف.
Cell من بطولة صامويل جاكسون و جون كوزاك و ايزابيل فوهرمان ومن إخراج تود ويليامز وهو نفس فريق عمل فيلم رعب تاني لسه جسمنا بيقشعر لما بنفتكره وهو فيلم 1408 عن كاتب رعب بيجد نفسه حبيس غرفة فندق ملعونة مسكونة بأرواح شريرة.
فيلم اليوم بيحكي عن لعنة أو خلل فني أو شىء ما بيصيب كل أجهزة الهواتف المحمولة على وجه الكرة الأرضية، بشكل بيحول أي شخص بيستعمل أي تليفون لزومبي بيبحث طوال الوقت عن لحوم البشر علشان يلتهمها.
واضح تماما إن العقدة الأساسية للفيلم قائمة على فكرة الإسقاط على إننا تحولنا لأفراد ممسكة بتليفوناتها المحمولة طوال الوقت، وإن التواصل الإجتماعي الشبكي أصبح هو المحرك الأول والأخير لنا، وأننا نسينا لمة العائلة وإزاي نكون أفراد متعاونين مع بعض على أرض الواقع. لكن للاسف الفيلم ماقدرش يعبر عن كل الكلام ده من خلال أحداث شيقة.
سيناريو الفيلم كان سىء جداً وضعيف إلي أقصى حد، والأحداث كانت متوقعة وقابلة للإستنتاج، كمان عدد مشاهد الإشتباكات والأكشن كان قليل جداً بالنسبة لفيلم رعب، الملل كان مسيطر علينا تماما وإحنا بنتفرج على الأحداث… ومافيش أسوأ من الملل لما يتسرب لفيلم المفروض إن تصنيفه فيلم رعب.
الأداء التمثيلي كان جيد وكان على مستوي جودة الفيلم، لكن زى ما قولنا السيناريو والحوار لم يخدموا الأداء التمثيلي أبداً، وبالتالى مهما كان الأداء التمثيلي قوي بيفضل عند المشاهدين إحساس عام بالضعف وعدم القدرة على التركيز مع أحداث الفيلم.
مين ننصحه بمشاهدة الفيلم؟ عشاق أفلام الزومبي أو الأفلام اللى بتحكي بشكل عام عن وباء أو مرض بيضرب مجموعة من البشر ومحاولة بشر تانيين الهروب من الوباء ده… لو مش من النوعية دي من المشاهدين ننصحك تختار عرض تاني.
