The Neon Demon : الصراع فى عالم الموضة والأزياء
كلنا عارفين الصراع اللى بيشهده عالم الموضة والجمال وعروض الأزياء وعالم الموديلز اللى بيتصارعوا فيما بينهم علشان يوصلوا لعالم الشهرة.. مهما كان التمن ومهما كان المقابل ومهما كانت الوسائل اللى ممكن يتبعوها علشان يوصلوا لهدفهم.
من تأليف وإخراج نيكولاس ويندينج ريفن وبطولة ايلي فانينج و كيانو ريفز و جينا مالون و بيلا هيثكوت بنشوف قصة الشابة الصغيرة جيسي أو ايلي فانينج، واللى بتخطو خطواتها الأولي فى عالم الموضة وعرض الأزياء.. جمال جيسي وسنها الصغير وقدرتها على التأقلم مع ظروف حياتها المتغيرة بيثيروا غضب بنات كتير شغالين فى المجال بقى لهم فترة طويلة.. الأمر اللى بيحول العلاقة بينهم وبينها من مجرد صداقه ومعرفه، لعداء ورغبة غير منتهية فى الإيذاء وإنهاء مسيرتها الفنية والعملية.
الفيلم من الأفلام القليلة اللى القصة مش بتكون هى العامل الأساسى لتفوقه، إنما الإخراج والإستخدام المتميز للإضاءة والديكور وباقى عناصر الفيلم السينمائى.. الفيلم قدم لغة سينمائية راقية معتمدة على مخاطبة عين المشاهد قبل مخاطبة إدراكة للقصة.. الألوان وتدرجاتها ونظام الإضاءة فى الفيلم كان عليهم عامل أساسى ومهم وكبير لنجاح الفيلم، أما الديكور واللى تنوع بين أماكن فخمة وعملية جدا هى معارض الأزياء وكواليسها وبين غرفة جيسي المتواضعة كان فى كل الأحوال قادر على التعبير عن مشاعر الأبطال وقصة الفيلم.
لا يمكن ننسى دور الموسيقي التصويرية اللى لعبت دور مهم فى الأحداث، وبعض المؤثرات الخاصة اللى تم إضافتها على العمل بحيث تسرب لنا احساس الخوف أو الرهبة فى كتير من المشاهد اللى بيلعب عليها الديكور والموسيقي والإضاءة.
بنعيب على الفيلم الملل اللى تسرب لنفسنا أحيانا مع طول بعض المشاهد، وحسينا إن السيناريو بيلجاً للـ(حشو) علشان يوصل للنهاية بأي شكل، الشعور ده لم يكن ملازمنا طول أحداث الفيلم لكننا حسينا بيه فى كتير من المشاهد علشان كده بنعتبر دي نقطة سلبية فى السيناريو.
The Neon Demon مش بس فيلم بيحكي عن كواليس عالم صناعة الموضة، لكن الفيلم فيه اسقاطات فلسفية وأخلاقيه كتير مع لمسة من الرعب اللى مش هاتحسها الا لو اتفرجت بنفسك عل الفيلم.
