The Founder : إزاي تأسست ماكدونالدز؟!
بالتأكيد كان عندنا فكرة مبدئية عن أن قصة تأسيس أكبر سلسلة مطاعم في العالم، بالتأكيد هاتكون قصة شيقة، لكن الفيلم قدر يحتفظ بالعديد من الأسرار والخفايا داخل أحداثه، بحيث نفاجأ بيها أثناء المشاهدة وتزيد متعتنا، وفى نفس الوقت فشل الفيلم في اللعب على بعض الأوتار اللى كان ممكن يلعب عليها أفضل من كده.. خلينا نتكلم أكتر في التفاصيل.
The Founder من إخراج جون لى هانكوك ومن تأليف روبرت دي سيجال ومن بطولة مايكل كيتون و كارا مانتيللا و ستيف كولتر و بي جي نوفاك و لورا ديرن و جون كارول لينش.
الفيلم المقتبس عن قصة حقيقية بيحكي عن قصة صعود رجل الأعمال راي كروك اللى بيقوم بدوره مايكل كيتون، وإزاي قدر يسيطر على مطعم برجر صغير باسم ماكدونالدز، ويحوله من مجرد مطعم محلي لأكبر سلسلة مطاعم في العالم، على الرغم من كونه مجرد شريك ومش المؤسس الفعلي لسلسلة المطاعم.
المميز في سيناريو الفيلم كانت قدرته على عرض المشكلات اللى بتواجه راي كروك وطريقته في التغلب عليها، أروع ما في السيناريو كان مشاهد الصراع والمشاكل والخناقات بين كوك وبين الأخوين ماكدونالدز.
لكن زي ما لكل شيء إيجابي ناحية سلبية، كان بيعيب السيناريو البطء الشديد في مشاهد راي في المنطقة اللى مش بيصارع فيها من أجل سلسلة المطاعم، زي علاقته بزوجته أو مثلا محاولة الترويج لمنتجاته في بداية الفيلم.. وفرق السرعة بين مناطق السيناريو كان من النقاط اللى بنعيبها على الفيلم.
الأداء التمثيلي كان متميز في مجمله، لكن مايكل كيتون لم يكن في أفضل حالاته، وشوفنا منه أداء تمثيلي في أدوار تانيه كانت تعتبر أقل من الدور الحالي لكنها كانت أقوي وأكثر تأثيرا على مستوي الأداء التمثيلي، لذلك نعتقد أن كيتون مش هايترشح لأفضل ممثل في الأوسكار، على الرغم من توقيت عرض الفيلم اللى بنعتقد أنه بيغازل فيه الجائزة الأشهر في عالم الأفلام.
الموسيقي التصويرية كانت ضعيفة وغير مؤثرة، ولم تقدم أي جديد أو حتي تعلق في أذهاننا وتجبرنا على البحث عنها بعد نهاية الفيلم، على العكس من الديكورات اللى قدرت تنقلنا لعالم الفيلم الزمني، أيضا أختيار الملابس وموديلات السيارات كان مافيهوش غلطة، وكل ده أدي لأنتقالنا زمنيا لعالم الفيلم، وده أكيد شيء مميز ويحسب للفيلم.
The Founder فيلم جميل لو هاتشوفوه خارج دائرة توقعات الأوسكار، لأنه في رأينا مش هايقدر ينافس على الجائزة.
علشان تبقي عارف: قام النجم (مايكل كيتون) بأخذ بعض دروس عزف البيانو استعدادًا للفيلم؛ وهذا بعد اكتشافه أن (راي كروك) الحقيقي كان شغوفًا بالعزف على البيانو.
