Manchester By The Sea : هل الماضي بيصنع مستقبلنا؟!

كلنا بتواجهنا مشاكل كتير وصعوبات في الماضي، ومعظمنا بيستطيع التغلب على مشاكله أو حتى نسيانها ومحاولة تجاهلها، علشان يقدر يستمر في حياته ويستكمل صناعة مستقبله.. لكن بعض الناس بتظل حبيسة أحداث الماضي، ومش بتقدر تتجاهله أو تتناساه، خاصة لو كان اللي حصل في الماضي.. مصيبة ومأساة حقيقية.

فيلم Manchester By The Sea بيعتبر تحليق هادئ في قصة رجل مسجون في ماضيه، وعلى الرغم من كل محاولاته الخروج منه، بتلعب الأقدار دور كبير ومهم علشان يرجع تاني ويواجه الماضي اللي بيحاول يتجنه طوال الوقت.

الفيلم من تأليف وإخراج كينيث لونرجان، ومن بطولة كيسي أفليك و  ميشيل ويليامز و  كيلي شاندلر و  جوش هاميلتون. الفيلم بيبدأ بمشاهد افتتاحية بنشوف فيها الحياة اليومية لـ(لي تشاندلر) الرجل المنطوي اللي له سلوك عدائي وغير اجتماعي مع الجميع، واللي بيعمل كسباك في مدينة بوسطن.

حياة لي بتتغير لما بيجيله أتصال مفاجئ بينقل له وفاة شقيقه الوحيد، واللي كان بيعاني من مرض نادر في القلب بيجعله دائما أقرب ما يكون للوفاة… ومع نهاية إجراءات الوفاة وقراءة الوصية، بيكتشف لي أن أخوه الوحيد أستأمنه على وصاية ابنه المراهق، لحين وصوله سن 22 سنه، وحينها بيقدر يكون مسئول عن نفسه وقراراته وحياته.

مع بداية معرفته بخبر وفاة شقيقه، بيبدأ لى في تذكر الأسباب الحقيقية وراء مغادرته لمدينة مانشستر المطلة على البحر، والمشكلة الأساسية في حياته اللي حولته لرجل غريب الأطوار، مش بيحب يقرب من الناس ومش بيسعي للزواج وتكوين أسرة.

الفيلم بيسلط الضوء على حالة التفكك الاسري اللي بيعاني منها المجتمع الأمريكي، بالإضافة لتدهور القيم وانتشار حالات الإدمان على الخمور وترك الأبناء بدون رعاية أو اهتمام، لكن سيناريو الفيلم قدر يوصل لنا رسائله على نار هادئة جدا، ورغم قلة أحداث الفيلم والبطء النسبي للسيناريو، لكن  مشاهدتنا للفيلم كانت مزيج من المتعة والتساؤل المستمر عن حالة لى النفسية والعقلية.

الفيلم قدر يبعد عن الملل من خلال الكادرات المتميزة والجميلة واللي أراحتنا بصرياً بدرجة كبيرة ومتميزة، كمان السيناريو وطريقة رسم الشخصيات وخاصة شخصية لى اللي لعب دوره كيسي أفليك كانت متميزة، ونعتقد أن كيسي هايكون من المنافسين بقوة على جوائز أوسكار السنة دي.

موسيقي الفيلم التصويرية كانت جيدة، وتميزت في نهاية الفيلم بإيقاع متميز، على الرغم من بساطتها وعدم ظهورها في كتير من المشاهد، لكنها قدرت تترك بداخلنا شعور جيد وإحساس عام بالهدوء والاسترخاء والراحة.

Manchester By The Sea من الأفلام اللي ماينفعش تشوفوها وانتوا منتظرين أحداث متلاحقة، أو مشاهد أكشن وخلافه، لكن الفيلم بيعتبر تحليق بطئ فوق عالم بتحصل فيه كل الأحداث المهمة ببطء، لكن في نفس الوقت بدون إحساس بالملل أو رغبة في نهاية الفيلم.

علشان تبقي عارف:

• اسم (مانشستر) في بداية الفيلم هو أسم مدينة أمريكية حقيقية في ولاية ماساشوستس
• تقييم الفيلم على موقع IMDB هو 1 من 10 وهو تقييم مرتفع، شارك فيه حوالي 75 ألف مستخدم للموقع.