Live By Night : رحلة صعود فى عالم الجريمة
فيلم Live By Night بيحمل فى طياته عنصريين أساسيين كان عندنا اشتياق كبير لهم.. الأول هو عالم الجريمة المنظمة الوقح والمميز لأمريكا فى فترة العشرينات والثلاثينيات، لما كانت العصابات بتسيطر على كل شىء تقريباً خاصة مع نهاية فترة الحرب العالمية الأولي، والعامل الثاني هو فكرة الشخصية اللى بتتحول من شخصية سوية ولها مستقبل باهر لشخصية إجرامية بتشق طريقها فى عالم من الفساد والدمار الأخلاقي والمالي.
فيلم Live By Night بيحكي عن جو كافلين اللى بنشوفه فى المشهد الإفتتاحي للفيلم مصاب بشدة وبيبدأ يحكي قصته مع كيفية تحولة من مقاتل عائد من الحرب لرجل عصابات، وقصة صعوده الغريب فى عالم الجريمة والمشاكل والعقبات اللى بتواجهه، والصراع الداخلي اللى بيعاني منه نتيجة شخصيته الجيدة والعالم الفاسد اللى بيجبره عند مرحلة ما انه يتحول لشخص فاسد أيضاً.
Live By Night من تأليف وإخراج وإنتاج وتأليف بن أفليك! وهو شىء مش عارفين هل أفاد الفيلم أم لا! ونقدر نقول أن كان له جوانب سيئة وجوانب كويسة فى نفس الوقت… الجوانب الجيدة كانت متمثلة فى أن البطل والمخرج والمؤلف لما يكونوا شخص واحد ده بيؤدي لحالة من الفهم الجيد جداً للأحداث والنص، ونقدر نقول أن شخصية المؤلف بتساعد المخرج اللى بيساعد البطل… اللى هم فى النهاية نفس الشخص!
أما الجانب السىء بيتمثل فى حالة التشتت اللى بنلاحظها فى الأحداث والإخراج والتمثيل، وده لأن كل المجهودات دي كانت ملقاه على عاتق رجل واحد فقط، وهو أمر مزعج ومتعب أكيد ومهما كان بن أفليك متميز وشاطر مش هايقدر يجمع بين كل المهام دي بكفاءة.
بعيدا عن بن أفليك، الأداء التمثيلي كان بيتأرجح مابين متوسط الى سىء، على الرغم من الشخصيات المرسومة كويس جدا إلا أن تجسيدها على الشاشة كان ضعيف، وبيشارك أفليك فى بطولة الفيلم ايلي فاننج و زوي سالدانا وسكوت ايستوود.
بنعيب على الفيلم بعض التطويل فى الأحداث، وإحساسنا بالمط خاصة فى النصف الأول من الأحداث، أما الربع الأخير من الفيلم تميز بعدد من المشاهد القوية والمطاردات اللى تم تنفيذها ببراعة وخشونة تناسب عصر العشرينات والبيئة المحيطة به من أعمال عصابات وقتل وتهديد وخطف، خاصة أن الفيلم بيركز على فترة منع بيع الكحول، وازاي قدرت العصابات تحقق أرباح ضخمة من كسر القانون الخاص بمنع بيع الكحول فى أمريكا.
ديكورات الفيلم كانت رائعة جدا، ونقلتنا بصرياً لحقبة مانعرفش عنها الكثير، كمان الإضاءة والكادرات المتميزة شاركت الديكور والموسيقي اللى كانت مدروس تماما لحظات قوتها وضعفعها علشان يقدموا لنا سيمفونية من الجمال المتكامل اللى قدر القائمين على الفيلم يديروها بحبكة وقوة طوال فترة أحداث الفيلم.
لو كنت من محبي أفلام العصابات والمطاردات والأحداث التاريخية.. ماينفعش تفوت مشاهدة Live By Night بحال من الأحوال.
علشان تبقى عارف:
كان المفروض يتم تقديم الفيلم فى وقت مبكر عن الوقت الحالي، لكن بن أفليك أخر الفيلم علشان يشارك فى فيلم Gone Girl من إخراج ديفيد فينشر.
