Bad Santa2 : كوميديا ضعيفة فى موسم الأعياد
توقعاتنا المبدئية عن فيلم Bad Santa فى جزئه التاني كانت بتقول إننا ممكن نكون أمام فيلم كوميدي إستثنائى، لكن للأسف النتيجة النهائية اللى شوفناها على الشاشة كانت فيلم أعياد معتمد فى المقام الأول على النكت الجنسية اللى بتخرج من أفواه السكرانين… الفيلم كان عامل زي نكتة قبيحة، لكن حتي النكت القبيحة ممكن تضحكنا أكتر من كده شويه!
Bad santa2 من إخراج مارك واترز وبطولة بيلي بوب ثورنتون و بريت كيلي و كريستينا هندريكس و توني كوكس و ريان هانسن و جيني زيجرينو.
الفيلم بيحكي عن (ويللي) اللى بيقوم بدوره بيلي بوب ثورنتون واللى بيعاني من اليأس فى حياته وعدم إحساسه بفايدتها، حتي أنه بيحاول ينتحر فى المشهد الإفتتاحي للفيلم، لكن الصدفة وحدها بتبعده عن مصير الإنتحار وبتضعه فى تنظيم عصابي بيستهدف سرقة حفل تابع لجمعية خيرية كبيرة، الأمر اللى –المفروض- ينتج عنه مشاهد كوميدية كبيرة.
مساحة الكوميديا فى الفيلم كانت قليلة جداً، وأعتمدت فى جانب كبير منها على التلميحات الجنسية والنكات الخارجة، لكن مانقدرش ننكر أن بعض المشاهد كان مضحك فعلا لكن مش بالقدر اللى كنا متوقعينه.
الأداء التمثيلي لأبطال الفيلم كان ضعيف ونمطي ومحفوظ، وكل شخصية كانت بتؤدي المطلوب منها وخلاص بدون أي محاولة لرسم شخصيات خارج المألوف، أو حتي شخصيات خارج المتوقع منهم فى أفلام تانيه.
على الرغم من تميز الديكورات واعتماد التصوير الخارجي للفيلم على مشاهد تساقط الثلوج والكادرات الجميلة اللى بترسمها، إلا أن الموسيقي التصويرية لم تكن بنفس القوة، وحسينا أنها مستهلكة ومافيهاش تجديد ومافيش حاجه منها علقت فى ذهننا أو حسينا أننا محتاجين نسمعها بشكل منفصل.
Bad Santa2 فيلم خاص بمواسم الأعياد، ومش بيقدم أبعد من بعض الكوميديا الضعيفة والتلميحات الغير ظريفة.
علشان تبقى عارف:
لورن جراهام كان المفروض تقوم بدور فى الفيلم، لكنها اعتذرت لارتباطها بفيلم Gilmore Girls: A Year in the Life.
