أفلام رعب ما تفوتهاش في سينمات القاهرة!
في واقع الأمر أننا ملاحظين في الفترة الأخيرة زيادة عدد أفلام الرعب في السينمات المصرية. ودي فرصة قوية لعشاق أفلام الرعب علشان يحضروا نفسهم لجولات لا تتوقف من أفلام الرعب على الشاشة الضخمة.
في الموضوع ده ها نستعرض معاكم الأفلام المرعبة اللي بنرشحها لكم للمشاهدة الفترة القادمة. وملخص لقصة كل فيلم علشان كل واحد يبقي عارف حجم الرعب اللي هايكون مقبل عليه الفترة القادمة!
Don’t Knock Twice
فيلم رعب بيعتمد على تكنيك الخوف من المجهول. وبيحكي عن شبح مرعب بيطارد أي شخص يطرق مرتين على أحد الأبواب المسحورة. موضوع الطرق على الباب المغلق بيظل في إطار الأسطورة، لحد ما بتقرر بطلة الفيلم تطرق الباب مرتين… حياتها بتتحول لجحيم بعد الموضوع ده!
بطلة الفيلم تبقي كاتي ساكوف اللي شاركت في أفلام رعب كتير قبل كده زي Oculus و The Haunting in Connecticut 2 وبيشارك أيضا في بطولة الفيلم لوسي بوينتون و خافيير بوتيت.
Don’t Hang Up
لو واحد فاكر نفسه ظريف وبيحب يعمل مقالب مرعبة في الناس. تفتكروا ايه ممكن يكون عقابه؟ عقابه أكيد هايكون إن حد يلعب معاه نفس اللعبة، ويخليه يدوق من نفس المقلب السخيف اللي بيعمله في الناس. لكن الأمور بتتطور لما الموضوع بيوصل لدرجة القتل واختطاف الرهائن. خاصة أن الشخص المجهول اللي بيعمل المقلب ده بيطلب شيء واحد: ماتقفلش خط التليفون وانت بتكلمه!
الفيلم من بطولة جريج سولكين و جاريت كلايتون و بيلا داين و سينا جيلوري
Life
وكأن كل الرعب على كوكب الأرض مش كفايه.. فيلم Life بيقدم فيلم رعب بيحصل في الفضاء الخارجي! من خلال كائن حي متطور جدا وبينمو بسرعة كبيرة جدا، وبينتقل لمكوك فضائي كانت مهمته الأساسية هي التقاط عينات من كوكب المريخ.
الفيلم بيلعب على نقطتين أساسيتين في القصة المرعبة: الرعب من كمية التقزز والقرف والمشاهد اللي ممكن تبوظ عليك وجبة الغذاء، وفى نفس الوقت الخوف من فكرة الوحش الذي لا يرحم وبيحاول يطارد مجموعة من البشر على متن مكوك فضائي.
المميز كمان في الفيلم هو فريق العمل اللي فيه أسماء مميزة زي جيك جيلنهال و رايان رينولدز و ريبيكا فيرجسون و هيرويوكي سانادا وكمان الفيلم من إخراج دانيال اسبينوزا
The Belko Experiment
تكنيك قديم لكن لسه مرعب كأننا بنشوفه لأول مره في حياتنا! مجموعة من الموظفين الأمريكيين بيتم احتجازهم في أحد المنشأت، في وسط يوم شغل عادي. ثم بيتم اخبارهم من خلال مكبرات الصوت، أن لازم كل واحد فيهم يقتل كل الناس اللي حواليه. ولو رفضوا اطاعة الأمر هايتم قتلهم جميعا بطريقة بشعة جدا!
السؤال الوحيد اللي هاتطرحه على نفسك وانت بتتفرج على الفيلم ده : كنت ها اعمل ايه لو كنت مكانهم؟!
الفيلم من تأليف جيمس جن ومن إخراج جريج ماكلين، والبطولة لـ أدريا أرجونا و جون سي مكجينيلي و توني جولدوين و ابرهام بينريبا.
ياتري هاتدخلوا أي فيلم من الأفلام دي؟ لو قلبكم يستحمل ممكن تدخلوا فيلمين من اختياركم ورا بعض علشان تبقي بجد ليلة الرعب!
