Vengeance: A Love Story : هل ينفع نحقق العدالة بنفسنا؟!
على الرغم من ضعف المستوى الفني للأفلام اللي بيقدمها مؤخرا، إلا أننا بنشجع في نيكولاس كيدج رغبته على تقديم أفلام جديدة اقوى، وبحثه وعمله الدائم على نفسه علشان يكون أفضل وأقوى.. واحنا فاكرين كويس نيكولاس كيدج المهرول على سجادة الأوسكار علشان يحصل على جائزة أفضل ممثل عن فيلم Leaving Las Vegas في التسعينات، والكلمة الضعيفة اللي القاها أثنائها، ومن بعدها وكيدج بيحصد النجاح فيلم بعد فيلم.
لكن مؤخرا كيدج انحدر في سلسلة أفلام ضعيفة ودون المستوى، وكان من الواضح أن النجم الكبير مش قادر يسيطر على هوة الفشل اللي بيتجه لها.
القصة
الفيلم بيحكي عن واحده بتتعرض للإعتداء الجنسي بعد حفلة صاخبة، ولما بيكتشف أحد جنود حرب الخليج أن القانون الوضعي مش هايقدر يجيب لها حقها، بياخد هو على عاتقه إنه ينتقم بنفسه من اللي اغتصبوها بدم بارد. ومن هنا بتبدأ سلسلة من عمليات المطاردة والانتقام في التهام الجانب الأكبر من وقت الفيلم.
فريق العمل
Vengeance: A Love Story من إخراج جوني مارتن، ومن تأليف سكوت وايندهاوزر، وبيشارك نيكولاس كيدج البطولة دون جونسون و ديبورا كارا أونجير و نيكول باريه و تاليثا بيتمان
السيناريو والحوار والتمثيل
للأسف لم يكن هناك أي جديد على مستوى السيناريو والحوار. لأن القصة نفسها كانت غير جديدة ومستهلكة، لكن لازم نقول أن نيكولاس كيدج كان محتاج لقصة قديمة وحبكة مضمونة النجاح علشان يحاول يقف على أقدامه من جديد وسط عالم من الفنانين الشباب والجدد والأفلام ضخمة الميزانية واللي أصبحت بتغزو هوليود في الوقت الحالي.
أما عن الأداء التمثيلي فعلى الرغم من تقليدية القصة واعتمادها على أنماط محفوظة إلا أن الأداء التمثيلي قدر يحافظ على الحد الأدني من شعورنا كمشاهدين بالمتعة وانتظار الجديد. وده يحسب لكل القائمين على الأدوار الرئيسية في الفيلم وعلى رأسهم نيكولاس كيدج طبعا.
الموسيقى والديكور
موسيقى الفيلم كانت جيده جدا، وقدرت تنقلنا للأحداث بقوة وسلاسة في نفس الوقت، على العكس من الديكورات اللي كانت محتاجة تكون أقوى، واللي جعلتنا نشعر بحالة من الاستسهال في صناعة الفيلم وتصويره.
الخلاصة
فيلم Vengeance: A Love Story فيلم تقليدي بقصة تقليدية، لكنه في النهاية بيقدم أداء تمثيلي مُرضي ومحاولة جديدة من نيكولاس كيدج للعودة للصدارة.
علشان تبقى عارف: نيكولاس كيدج كان عاوز يخرج الفيلم بنفسه، لكنه في النهاية قرر الاكتفاء بالقيام بدور البطولة.
