Going in Style : ازاي 3 عواجيز ممكن يسرقوا بنك؟!
سنة 1979 قدمت هوليود فيلم عن مجموعة من الرجال العواجيز بتقرر تسرق بنك، الفيلم كان اسمه Going in style، وحقق نسبة مشاهدة ممتازة نتيجة حالة التعارض بين أعمار الرجال الكبار في السن وبين المهمة اللي بيسعوا لها. وده كان مصدر الكوميديا الأساسي في الفيلم.
اليوم وبعد حوالي 38 سنه، بتعيد هوليود تقديم الفيلم من جديد بحذافيره تقريبا… لكن للصراحة، يبدو أن النجاح هايكون من نصيبهم المرة دي أيضا!
فريق العمل
Going in Style من إخراج زاك براف ومن تاليف تيودور ملفي، اقتباسا عن الرواية الأصلية اللي كتبها مارتن بريست. أما البطولة كانت من نصيب مورجان فريمان و مايكل كين و ألان أركين. والحقيقة أن الابطال الثلاثة من أقوي وأجمد الممثلين في زمانهم.
القصة
الفيلم بيحكي عن 3 رجال عواجيز، بيطلعوا للمعاش من وقت طويل، وبيعيشوا اعتمادا على حساباتهم البنكية اللي بيتم وضع أموالهم فيها كل شهر. لكن بسبب ما الأموال دي مش بيتم ايداعها أكتر من كده، وبيبدأوا يعانوا من الفقر، ثم بيكتشفوا أن البنك هو اللي سرق فلوسهم، ومن ثم بيقرروا انهم يسرقوه ويستولوا على أموالهم بالقوة… بس ازاي؟!
الاخراج
الحقيقة أن الإخراج لم يقدم جديد. كل اللي حصل انه اقتبس الفيلم القديم وأعاد تقديمه من جديد مش أكتر. لكن لا يمكن نتجاهل فكرة السهل الممتنع اللي قدر الفيلم يقوم بيها، وإزاي قدر الفيلم يوازن ما بين تقديم قصة كوميدية سهله وخفيفة، وفى نفس الوقت تكون القصة دي غير هزلية، وقوية وقادرة على جذب المشاهد ليها كقصة منفصله بذاتها عن الأحداث الكوميدية.
الأداء التمثيلي
بما اننا بنتكلم عن 3 نجوم كبار بحجم أبطال الفيلم، فا الأداء التمثيلي كان أكتر من رائع، والكوميديا كانت غالبه على النصف الأول من الفيلم، لكنها بتتراجع بعد ذلك علشان تسيب الفرصة لأحداث الفيلم العادية بالتدفق حتى نهاية الأحداث.
الموسيقى والديكور
من الأمور المميزة في الفيلم كانت الموسيقى الحماسية واللي تم توظيفها بشكل رائع وحماسي على مدار احداث الفيلم، لكن الديكورات لم تكن بنفس قوة الموسيقى على الإطلاق، وشعرنا انها كانت محتاجه تكون أقوى وأكثر تركيزا على خدمة الأحداث.
الخلاصة
Going in style فيلم كوميدي متميز لنجوم كبار ولهم وزنهم. ويصلح لمشاهدة رائقة في إجازة نهاية الأسبوع.
علشان تبقى عارف:
الفيلم يعتبر سادس تعاون بين النجميّن الكبيريّن (مورجان فريمان، ومايكل كين).
