Power Rangers : إعادة اصدار ناجحة لسلسلة قديمة.

مغامرة القوة أو Power Rangers تعتبر واحدة من أقوي وأطول سلاسل الأعمال الفنية في تاريخ هوليود. مواليد الثمانينات والتسعينات من قراء الموضوع ده ممكن يرجعوا بالذاكرة لطفولتهم علشان يفتكروا المسلسل التليفزيوني اللي كان مكتسح عقول الأطفال أيامها عن مغامرو القوة.

نقدر نقول أن مغامرو القوة بيتم تقديم شخصياتهم وأعمالهم من سنة 1996 تقريبا، سواء في ألعاب الكترونية أو أفلام طويلة أو مسلسلات بيمتد عرضها لمواسم متتالية، أو حتي لأفلام قصيرة وأعمال فنية بتتراوح جودتها واقناعها للمشاهدين على حسب الميزانية المتاحة.

مع الوقت وتوقف انتاج أفلام قوية عن السلسلة، بدأ محبي السلسلة في التفكير: ايه اللي ممكن نشوفه لو أتيح للسلسلة القديمة المتوقفة من فترة طويلة، أن يتم إعادة انتاجها بميزانية ضخمة؟ هو ده اللي حصل في فيلم Power Rangers اللي بنتكلم عنه في موضوعنا.

فريق العمل

Power Rangers من إخراج دين إسرائيليت وتأليف جون جاتنز أما البطولة فكانت من نصيب داكري مونتجمري و ناعومي سكوت و آر جي سايلر و بيكي جي و لودي لين

 القصة والسيناريو والحوار

الفيلم بيحكي عن قصة مجموعة من الشباب اللي بيدرسوا في المرحلة الثانوية في المدارس الأمريكية، ومش بيربط بين الشباب دول أي عامل مشترك سوي الدراسة في مدرسة واحدة ومدينة واحدة، لكن القدر بيجمعهم علشان يكتشفوا وجود سفينة فضائية تحت أرض المدينة بتاعتهم.

من خلال تجربة غريبة مع المركبة الفضائية، بيكتسب كل واحد فيهم قوة خارقة متناسبة مع طبيعة شخصيته، ومتوافقة أيضا مع اللون اللي كل واحد اختاره لنفسه. ومن هنا بيعرفوا ان تم اختيارهم ليكونوا مقاتلي قوة أو Power Rangers للدفاع عن كوكب الأرض، خاصة مع صحوة قوة شريرة بقيادة (ريتا) اللي بتحلم بتدمير الكوكب وإنهاء الحياة عليه.

الأداء التمثيلي

الأداء التمثيلي لكل الأبطال كان متميز، وقدر كل بطل من الأبطال يظل محتفظ بشخصيته الخاصة ويخلق لنفسه خط واضح وثابت يقدر يمشي عليه، وبتضافر مجهود الأبطال فا كل واحد من المشاهدين بيلاقي نفسه مرتبط بشخصية معينة، وحاسس بقرب منها أو حاسس أن الشخصية بتعبر عنه بشكل أو بأخر.

الإخراج والمؤثرات

من المميز في الفيلم فكرة المؤثرات الخاصة والميزانية الضخمة المخصصة للفيلم، والحقيقة أن العرض بالمؤثرات الخاصة واحد من أهم عوامل نجاح الفيلم، ولو كان تم عرض الفيلم بمؤثرات التسعينات كان ها يتحول لفيلم كوميدي ساخر في النهاية! لكن المؤثرات الخاصة قدمت في النهاية اللي عليها وسببت حالة من المتعة والتسلية في قاعات السينما.

إخراج الفيلم على الرغم من تميزه، حسينا الى حد ما ببعض التوهان بين الشخصيات، وعدم العدالة فيما يتعلق بتوزيع مساحات الظهور على كل الأبطال، لكن بنعتقد أن حتى لو شخصيات معينة تم هضم حقها في الجزء الحالي، أكيد هايكون لها دور أقوى في الأجزاء القادمة من السلسلة.

الخلاصة

فيلم Power Rangers يعتبر إعادة إصدار قوية ومميزة لسلسلة قديمة، بتقنيات حديثة وميزانية ضخمة. منتظرين المغامرة الجديدة لمغامرو القوة!

علشان تبقى عارف: (دانييل زوفاتو)، (روس بوتلر)، و(بريان سيري مارك) كانوا على قائمة المُرشحين لأداء دور (زاك تايلور).