Beauty and the Beast : إبهار ضخم بدون تجديد في القصة

خطوة جديدة قامت بيها ديزني مؤخراً، وهي البدء في إعادة إصدار أفلامها اللي أصدرتها في الماضي في فترة أواخر الثمانينات وأوائل التسعينات. سلاسل من الأفلام اللي كانت محببة لنا وأحنا صغار، بدأت ترجع من جديد للسينمات، باستغلال تقنيات الثري دي و IMAX وغيرها من تقنيات العرض الحديثة اللي حولت الأفلام دي لعالم حقيقي من الخيال.

ومن بين الأفلام دي بنشوف فيلم Beauty and the Beast اللي ألفه ستيفن تشبوسكي اقتباسا عن الرواية الأصلية لـ ليندا ولفيرتون، ومن إخراج بيل كوندون.

الفيلم بيحكي عن بنت جميلة أسمها بيل، بيتم اختطاف والدها على يد وحش ضخم وسيء السلوك، ولما بتسعي بيل لتحرير والدها، بينتهي بيها الأمر حبيسة عند الوحش مكان والدها المختطف، ومن هنا بتبدأ بيل في التعرف عن قرب على شخصية الوحش، علشان تكتشف إنه كان أمير جميل، لكنه أصيب بلعنه حولته لوحش، هو والحاشية المحيطة به، ومن هنا بتبدأ تكتشف مع الوقت إن سلوكه السيء مجرد عرض جانبي، لكنه في الحقيقة أفضل بكثير من الشكل البشع اللي بيبدو به.

بالنسبة لفيلم بيقدم إعادة إصدار لفيلم قديم صدر سنة 1991 على شكل فيلم أنيميشن، واليوم بتقوم ديزني بتقديمه من جديد في صورة فيلم حقيقي. بالنسبة للحقيقة دي لازم نعترف أن الفيلم قدم إبهار أكثر من رائع، وأستغل التقدم الكبير في تكنيكات التصوير والإضاءة وإخراج الصوت وتنفيذ الخدع، بشكل جعلنا نشعر بالانبهار مع كل مشهد بنشوفه على الشاشة.

الفيلم من بطولة إيما واتسون و دان ستيفنز و لوك إيفانز و  جوش جاد و كيفين كلاين و إيان ماكلين

والأداء  التمثيلي لكل الأبطال كان قوي ومتميز، وكان واضح أن الفنانين عارفين قيمة مشاركتهم في فيلم كانت نسخته الأصلية محفورة في ذاكرة كل طفل فينا في التسعينات، وكانوا ناجحين في مهمتهم للحد الأقصى.

لكن بنعيب على سيناريو الفيلم عدم إدخال أي تجديد على مستوي القصة، وعدم خلق أي خيط جديد فيما يتعلق بالسيناريو. الفيلم أكتفي بإعادة تقديم القصة القديمة كما هي دون زيادة أو نقصان، ولو كان القائمين على الفيلم تعبوا نفسهم شوية وقدموا ولو خيط واحد جديد في الأحداث. كان الفيلم هايكون في منطقة أروع من السحر والجمال.

يا كل من فاتكم Beauty and the Beast وانتوا أطفال… السحر بيتم عرضه مجددا في السينمات في 2017.. ما تفوتوش الفرصة!

علشان تبقى  عارف:

• كان النجم (ريان جوزلينج) مُرشحًا للعب دور (الوَحش) في الفيلم، ولكنه رفض الدور.
• تقييم الفيلم على موقع IMDB9 من 10 وده يعتبر تقييم مرتفع جدا. شارك في التقييم حوالي 30 ألف مستخدم للموقع.