Vincent N Roxxy: صراع بين الحب والعنف

الحب والعنف دايما بيكونوا على طرفي نقيض. لأن المفروض أن الحب بينبذ العنف وبيتصارع معاه، لكن أحيانا بيكون العنف والحب وجهان لعملة واحدة، وده اللي بيناقشه Vincent N Roxxy ، لكن هل نجح الفيلم أنه يبرز لنا الحقيقة دي؟ هو ده اللي هانعرفه مع بعض.

القصة

الفيلم بيحكي عن بنت وحيدة بتلتقي مع رجل بيسيطر العنف على حياته، وبشكل غير متوقع بتحصل بينهم علاقة حب، وبنحاول نعرف طوال الأحداث هل هايقدر الحب يعالج التحديات اللي بتظهر بينهم؟ وهل هاينفع أن ماضيهم يتركهم في حالهم ولا هايفضل يطاردهم للنهاية؟

فريق العمل

الفيلم من تأليف وإخراج  جاري مايكل شولتز وبطولة بوو ناب و سكوت ميسكودي و زوي ديوتش و  جيسون ميتشيل و  إيموري كوهين و زوي كرافيتز

الأداء التمثيلي

طبعا التركيز الرئيسي في الأحداث كان على ايميل هيرش اللي قام بدور فينسنت و زوي ديوتش اللي قامت بدور روكسي، لكن الحقيقة أن زوي قدرت تسرق الأضواء من ايميل وتقوم بدور قوي ومميز عنه، لكن بشكل عام الأداء التمثيلي لكل الأبطال كان محتاج يكون أقوى وأكثر تركيزا.

السيناريو والحوار والأخراج

إخراج الفيلم اعتمد على السيناريو السريع والمتلاحق للأحداث، لكن السيناريو أحيانا كان بيكون بطيء عند بعض المشاهد والتفاصيل واللي حسينا بعد كده أنها مكانتش مهمة، والحقيقة أن المسئولية عن الموضوع ده بتقع على عاتق السيناريو والأخراج، اللي هو في النهاية مسئول عن العمل كله بكافة تفاصيله.

الديكورات والموسيقى والأزياء

من أكتر الأمور المميزة في الفيلم كانت الموسيقى التصويرية واللي كانت مميزة وحولت خلفية الأحداث لحالة من الحب والحركة طوال الوقت، لكن الديكورات مكانتش بنفس قوة الموسيقى التصويرية وكانت محتاجة تكون أفضل أو يتم الاهتمام بيها بشكل أفضل من اللي شوفناه في النهاية.

الخلاصة

فيلم Vincent N Roxxy بيجمع بين الحركة والجريمة والدراما مع لمسة من الرومانسية. بنرشحه للمشاهدة الرايقة في الويك اند بدون توقعات كبيرة من المشاهدين.

علشان تبقى عارف:

ايميل هيرش بطل الفيلم شارك قبل كده في أعمال زي Milk و Into the wild