شنطة حمزه: حماده هلال نصاب في موسم العيد

حماده هلال من المطربين  والممثلين اللي بنحترم تجربتهم الفنية. حتى لو تعثروا أو ماقدروش يقدموا أعمال على مستوى عالي من القوة… زي شنطة حمزه!

القصة

الفيلم بيحكي عن نصاب محترف بيحب بنت شابه بتشتغل هي كمان في نفس مجال النصب اللي هو شغال فيه. الأمر اللي بيدخلهم في مجموعة من المواقف الكوميدية اللي مش بتتوقف.

فريق العمل

الفيلم من بطولة حماده هلال ويسرا اللوزي وراندا البحيري و سامية الطرابلسي و بيومي فؤاد وضياء الميرغني. أما مخرج الفيلم فكان اكرم فاروق والمؤلف أحمد عبد الله.

الأداء التمثيلي

الأداء التمثيلي لحماده هلال كان جيد على الرغم من انه كان محتاج كتير من الشغل عليه علشان يكون أفضل، لكن في النهاية لازم نعترف أن حماده هلال بينتمي في المقام الأول لعالم الغناء مش لعالم التمثيل. أما باقي أبطال الفيلم فجاء أداؤهم التمثيلي في الدرجة المقبولة والمتوقعة منهم.

السيناريو والحوار والأخراج

سيناريو الفيلم كان ممل شوية خاصة في الجزء الأول من الأحداث، بعد كده بدأنا نشعر ببعض الانجذاب ومتابعة الأحداث، لكن بالنسبة لفيلم خفيف ومناسب لموسم العيد نقدر نقول أن السيناريو بتاع الفيلم كان جيد جدا.

الديكورات والموسيقى والأزياء

الموسيقى وأغاني الفيلم كانت جيدة جدا بحكم وجود حماده هلال طبعا، لكن ديكورات الفيلم كانت محتاجه تكون أفضل من كده بكتير، وكنا محتاجين نشعر ببعض الاهتمام بشكل عام بالموسيقى التصويرية والديكورات والازياء أكتر من اللي شوفناه في النهاية.

الخلاصة

شنطه حمزه مش أحسن فيلم في موسم العيد بالتأكيد، لكن بالنسبة لجمهور العيد اللي عاوز فيلم خفيف وأغاني شبابية وخلطة مش كاملة لكن ظريفة بما فيه الكفاية، الفيلم في الحالة دي فقط ممكن يكون كويس.

علشان تبقى عارف:

مؤلف الفيلم أحمد عبد الله هو أيضا مخرج فيلم البيه رومانسي وليلة سقوط بغداد