الخلية: اكشن متميز في العيد

بعيدا عن الأسفاف أو مخاطبة غرائز الجمهور أو أي وسيلة كسب غير مشروعة، بيقدم صناع فيلم الخلية حالة من الأكشن الموصول بسيناريو قوي وقصة جذابة وإخراج متميز، وفى رأينا بنعتقد أن فيلم الخلية هو أفضل أفلام عيد الأضحى المبارك.

القصة

الفيلم بيحكي عن سيف (أحمد عز) ظابط في العمليات الخاصة في وزارة الداخلية، بيتتبع مجرم خطير اسمه مروان (سامر المصري) بمساعدة صديقه عمرو (محمد ممدوح) علشان ينتقموا لروح صديقهم اللي مات في أحد العمليات الخاصة بالقبض عليه، وفى باقي أحداث الفيلم بيستعرض المخاطر اللي بيواجهها رجال الأمن علشان يوفروا لنا حياة أمنة وكريمة.

فريق العمل

الفيلم من بطولة أحمد عز ومحمد ممدوح وأمينة خليل وسامر المصري ومن اخراج طارق العريان وتأليف صلاح الجهيني، صلاح هو مؤلف فيلم أولاد رزق اللي قام عز ببطولته، وطارق العريان هو مخرج فيلم أولاد رزق برضو.

الأداء التمثيلي

الأداء التمثيلي ماقدمش جديد لأبطال الفيلم الرئيسين، لكنه أكد بالفعل على موهبتهم وتميزهم. أحمد عز بيقدم أداء تمثيلي مش مختلف عن باقي أعماله السابقة خصوصا أولاد رزق، كمان محمد ممدوح في دور صديق البطل لم يقدم جديد، لكن لازم نقول أن الأداء التمثيلي لكل الابطال كان متميز وكان في أفضل صوره، لكن ماشوفناش بطل خرج من جلده الفني وقدم شيء جديد.

على الرغم من صغر مساحة دورها، لكن ريهام عبد الغفور قدرت تقدم أداء تمثيلي قوي ومميز ومختلف وجميل.

السيناريو والحوار والأخراج

سيناريو الفيلم سريع ولم يتركنا للملل ثانية واحدة، خصوصا من بداية الربع الثاني للأحداث، وكانت بصمة طارق العريان واضحة على أحداث الفيلم من البداية للنهاية، كمان اخراج مشاهد الأكشن تم بصورة احترافية رائعة، وعرفنا ان بعض مشاهد الفيلم تم تصويرها بتسع كاميرات مختلفة علشان تخرج لنا حقيقية وقوية، لكن بنعيب على بعض المشاهد أن كان واضح فيها جدا الاستعانة بالمؤثرات الخاصة أو الدوبليرات، لكن غير كده الفيلم كان قوي على مستوى الاكشن والإخراج.

الديكورات والموسيقى والأزياء

ديكورات الفيلم كانت مميزة خاصة مشاهد التدريب ووزارة الداخلية، كمان ميز الفيلم تصويره في بعض المناطق الحقيقية زي منطقة وسط البلد وشارع شامبليون ومحطة مترو الانفاق وغيرها، أزياء الابطال كانت رائعة خاصة ملابس أمينة خليل، أما الموسيقى التصويرية فكانت قوية لكن كنا نحتاج أنها تكون أقوى وأكثر ملائمة لجو الأحداث العام.

الخلاصة

فيلم الخلية فيلم قوي، غير مبتذل، متعوب عليه وبيقدم أكشن جديد و (فريش).. ننصح كل محبي أفلام الاكشن أنها تشوفه.

علشان تبقى عارف:

الفيلم يعتبر التعاون الثاني بين طارق العريان وصلاح الجهيني وأحمد عز على التوالي بعد فيلم (ولاد رزق).