It: الخوف من المهرج!
كلنا في أعماقنا بنحمل حالة من الخوف الغير مبرر من المهرجين. يمكن علشان المكياج على وجههم بيخليهم مبتسمين طوال الوقت بدون ما نعرف حالتهم النفسية الحقيقية، أو يمكن لأن البشر بطبيعتهم مش بيحبوا أي شخص بيرتدي مكياج أو قناع على وجهه حتى لو كان القناع لإنسان بيضحك؟ عموما فكرة الخوف من المهرج هي التيمة اللي لعب عليها فيلم It وهو واحد من أكتر أفلام الرعب انتظارا في 2017
القصة
الفيلم بيحكي عن أحداث خيالية بتدور في أحد المدن، مع انتشار ظاهرة اختفاء الأطفال بشكل مريب، واللي بترتبط بظهور مهرج مخيف مسئول عن خطف الأولاد، ومن هنا بيقرر مجموعة من الأطفال البحث وراء الظاهرة ومحاولة تفسير سبب اختفاء الأطفال ومين المهرج المرعب اللي بيعمل كل الأحداث دي. خاصة ان واحد من أعضاء الفريق ده فقد أخوه على يد المهرج في الماضي.
فريق العمل
قصة الفيلم مأخوذة عن رواية لكاتب الرعب الشهير ستيفن كينج، وستيفن قدم مجموعة مهمة من الروايات المرعبة واللي تحول معظمها لأفلام وأعمال درامية شكلت علامات في سينما الرعب في هوليود، ومن هنا بييجي الاهتمام بالفيلم. بطولة It كانت من نصيب فين وولفارد و ميجان تشاربينتير و أوين تيج و بيل سكارسجارد. أما الأخراج فكان لـ أندريس موسشيتي
الأداء التمثيلي
الأداء التمثيلي للأبطال كان جيد، وقدر الإخراج يحدد لكل شخصية من شخصيات الفيلم خيط رئيسي يحدد شخصيته، وقدر كل واحد من الأبطال أنه يحتفظ بشخصيته على الخيط الرئيسي المرسوم له بشكل جيد. ونخص بالذكر هنا جادين لييبيرهير و جيرمي راي تيلور واللي قدموا أداء تمثيلي متميز ويستحق التحية بالفعل.
السيناريو والحوار والأخراج
سيناريو الفيلم كان خالي من الخدع أو المطبات أو أي محاولة لمفاجأة الجمهور، وده مش معناه أننا لم نشعر بالمتعة، بل على العكس الفيلم كان ممتع وقدر يوصل لنا القصة بشكل مميز، لكن في نفس الوقت لم نشعر بالرعب، وحسينا أن الفيلم كان مركز على جانب الغموض أكتر من التركيز على فكرة الرعب.
الديكورات والموسيقى والخدع
ديكورات الفيلم قدرت تنقلنا بصريا للفترة الزمنية اللي بتدور فيها الأحداث، أما الموسيقى التصويرية فا قدرت هي كمان تجعلنا نشعر بالتوتر والحيرة والفزع في كتير من المشاهد، أما الخدع السينمائية فكانت قليلة ومش كتيرة على الرغم من نوعية أفلام الرعب اللي بتتطلب كتير من مشاهد الخدع، لكن استخدام الخدع كان قليل ومؤثر في نفس الوقت.
الخلاصة
فيلم It مش أفضل فيلم رعب نشوفه مؤخرا، لكنه محاولة ناجحة وقوية لخلق حالة من الترقب والتوتر على مدار حوالي ساعتين هم عمر أحداث الفيلم.
علشان تبقى عارف:
تقييم الفيلم على موقع IMDB 8.1 من 10 وشارك في التقييم حوالي 60000 مستخدم للموقع
