Hunter’s Prayer: أكشن بلا توقف في سينمات القاهرة
أحيانا بنشعر أن قصة الفيلم هي في الأساس مجرد خيط درامي واهي علشان يتم تقديم سلسلة من مشاهد الأكشن بلا توقف. ودي خلاصة رأينا في فيلم Hunter’s Prayer لكن لو عاوزين تعرفوا أكتر عن الفيلم تابعوا رأينا بالتفصيل في السطور القادمة.
القصة
فيلم Hunter’s Prayer بيحكي عن قاتل محترف بينفذ عملياته بدم بارد، لكنه بيتردد لما بيتم تكليفه بقتل امرأة شابة، التردد ده بيغير القصة تماما وبيدخل الجميع في دوامة من الهروب من القتل من ناحية، ومن محاولة اكتشاف سبب محاولة الاغتيال من الأول من ناحية تانية. لكن هل هاتنكشف كل الأسرار دي؟ ده اللي هانحاول نعرفه من خلال الفيلم وأحداثه.
فريق العمل
الفيلم من أخراج جوناثان موستو ومن بطولة سام ورثينجتون و مارتن كومبستون و أوديا راش و فيرونيكا إشيجول و ألين ليش أما التأليف فا كان من نصيب بول ليدن اقتباسا عن رواية كيفين ويجنال.
الأداء التمثيلي
نقدر نقول أن الأداء التمثيلي كان مقسوم مناصفة بين سام ورثينجتون اللي قام بدور لوكاس وبين اوديا راش واللي قدر كل واحد فيهم أنه يقوم بالمطلوب منه بالظبط في الفيلم. وفي واقع الأمر المطلوب مكانش كتير من وجهة نظرنا علشان مشاهد الأكشن كانت طاغية على معظم الأحداث الدرامية ماعدا بعض الأحداث البسيطة اللي تخللت مشاهد الاشتباكات والمطاردات، ودي قدر الابطال يقوموا فيها بدورهم على أكمل وجه.
السيناريو والحوار والأخراج
سيناريو الفيلم كان مخلص لفكرة المطاردات والأكشن طوال الوقت من أول مشهد لأخر مشهد تقريبا، وده سهل علينا كمشاهدين متابعة الفيلم لكن في نفس الوقت ممكن يعكس انطباع عند الجمهور اللي مش بيحب الأكشن بالقدر ده أن الفيلم سطحي شوية، خاصة مع بعض المبالغات في مشاهد الأكشن واللي بيتحمل الأخراج الدور الأول والأخير فيها. لكن في النهاية تصنيف الفيلم كان واضح من البداية والمشاهدين كانوا عارفين هايشاهدوا ايه بالظبط.
الديكورات والموسيقى والأزياء
على الرغم من كثرة مشاهد التصوير الخارجي الا أن مشاهد التصوير الداخلية كانت جيدة من حيث الديكورات، لكن الموسيقى التصويرية كانت محتاجه تكون أقوى من كده علشان نشعر بانسجام كامل مع أحداث الفيلم.
الخلاصة
Hunter’s Prayer فيلم مخلص للأكشن ومشاهد الاشتباكات الى ابعد الحدود، وهايعجب المشاهدين اللي بتجذبهم النوعية دي من الأفلام جدا.
علشان تبقى عارف:
كانت الممثلة هالي ستينفيلد هي المُرشحة الأصلية للعب دور البطولة، ولكنها انسحبت بسبب تعارض مواعيد تصويرها في جدول مواعيدها.
