Valerian and the City of a Thousand Planets: مغامرة مختلفة في عالم الخيال العلمي

من أفضل الأمور المميزة في Valerian and the City of a Thousand Planets مش بس انه مقتبس عن رواية مصورة، لكنه أيضا قدر يقدم حالة من المتعة البصرية، ومع عرض الفيلم على شاشات Imax أصبحت المتعة مضاعفة ومميزة.

القصة

Valerian and the City of a Thousand Planets بيحكي عن اثنين من عملاء السفر عبر الزمن، واللي بيدخلوا في مغامرة غير متوقفة لحماية عالم ألفا من الأعداء اللي مش بس بيهددوا العالم المميز ده، لكنهم بيهددوا أيضا مستقبل العالم اللي كلنا عايشين فيه.

فريق العمل

الفيلم مقتبس عن قصص مصورة كتبها بيير كريستين وكتب السيناريو والحوار لها لوك بيسون وقام بدور البطولة في الفيلم دان ديهان و كارا ديليفين و كليف اوين و ريهانا أما إخراج الفيلم فكان للوك بيسون.

 الأداء التمثيلي

عجبنا في الأداء التمثيلي قدرة الممثلين على تقديم أداء متناسب مع الطبيعة الزمانية للأحداث الفيلم واللي بتدور في المستقبل. وده كان محتاج غير القدرة التمثيلية أداء متميز من المسئولين عن الملابس والمكياج في الفيلم. ودي نقطة هانتطرق لها في باقي كلامنا  عن الفيلم.

كارا ديليفين قدرت تقدم دور مميز ومختلف عن باقي أدوارها في الأفلام التانية اللي قامت ببطولتها قبل كده، أما دان ديهان فا قدر يقدم أداء مميز بالمقارنة مع تاريخه السينمائي اللي ماقدمش فيه أدوار قوية بما فيه الكفاية.

السيناريو والحوار والأخراج

سيناريو الفيلم فشل في سحبنا لمنطقة الأحداث، خاصة في الربع الأول من الأحداث، لكن مع الوقت قدر السيناريو ياخدنا بهدوء للاحداث، وقدر يجعلنا نتحول لجزء مشارك في سيناريو الفيلم مش مجرد متابعين للأحداث وده شيء يحسب للسيناريو، كمان حوار الفيلم قدر يشارك في نفس الدور وإن كنا شعرنا في بعض المشاهد أن الحوار متكلف شوية وكان محتاج يكون أبسط من كده.

الديكورات والموسيقى والأزياء

من أفضل الأشياء اللي ميزت الفيلم هي الديكورات الحديثة واللي واضح عليها البذخ الأنتاجي والاهتمام بالتفاصيل، كمان موسيقى الفيلم المختلفة والمميزة كانت جميلة ورائعة وساعدت على دخولنا في الأحداث بسهولة ويسر، أما تصميمات الملابس والمؤثرات الخاصة فكانت فعلا من أجمل ما شوفنا في أفلام الخيال العلمي في الفترة الأخيرة.

الخلاصة

بنرشح فيلم Valerian and the City of a Thousand Planets للمشاهدة من الناس عاشقة أفلام الخيال العلمي والفانتازيا، خاصة مع عرض الفيلم على شاشات الأيماكس.

علشان تبقى عارف:

الفيلم يعتبر أول فيلم مقتبس عن القصص المصوّرة للمخرج (راتجير هور) منذ فيلم (Batman Begins) عام 2005.