Railroad Tigers: أكشن وكوميديا بنكهة صينية
من الجميل أننا من وقت للتاني ننفتح على ثقافات جديدة ونتفرج على أفلام أجنبية مالهاش علاقة مباشرة بالواقع الأمريكي اللي فارض نفسه علينا من خلال أفلام هوليود اللي شبه مسيطرة على الساحة السينمائية الأجنبية في مصر والمنطقة العربية. فيلم Railroad Tigers ممكن يمثل كسر لحالة من الملل ممكن تصيب ناس كتير من كترة مشاهدة الأفلام الهوليودية. تعالوا نعرف أكتر عن الفيلم.
القصة
الفيلم بيستعرض مغامرة واحد من عمال السكة الحديد الصينيين سنة 1941 ضد المحتل الياباني، وكمية من المغامرات اللي بيخوضها (مايوان) أو جاكي شان علشان يقدر يوفر أبسط سبل الحياة الكريمة لنفسه وللناس التانيه في فترة صعبة من فترات الصين اللي كانت واقعة في الفترة دي تحت الاحتلال الياباني.
فريق العمل
الفيلم من بطولة جاكي شان و وانج-دا لو و زيتاو هوانج و فان زو و كاي وانج و هيروكي إيكوشي. ومن أخراج شينج دينج وتأليف هي كيكي ودينج شينج.
الأداء التمثيلي
جاكي شان بيقدم أداء تمثيلي متعارف عليه ومحفوظ منه، سواء على صعيد الكوميديا أو الأكشن، والحقيقة أن ده في حد ذاته أمر صعب مع تقدم جاكي شان في السن، واستغراب كتير من المشاهدين من قدرة (شان) على أداء مشاهد الأكشن بنفس القوة والروح اللي كان بيؤدي بيها لما كان شاب صغير في السن.
طبعا احنا عارفين أن بيكون هناك استعانة بالمؤثرات الخاصة وخدع الكمبيوتر والمشاهد اللي بيقديها الدوبلير، لكن ده لا ينفي ان جاكي شان من الممثلين اللي بيحبوا يقوموا بجزء كبير من المشاهد الخطرة بنفسهم زي أحمد السقا عندنا، وده أمر يحسب له بالإضافة لفدراته التمثيلية العالية.
السيناريو والحوار والأخراج
سيناريو الفيلم بيحاول انه يبعدنا عن الشعور بالملل لكن للأسف حسينا بجزء كبير من الملل خاصة في الربع الأول من الاحدث، بعد كده الأمور بتبدأ تبقى أفضل وبنشعر أن السيناريو قادر يكون متماسك وقوي وجذاب، خاصة مع دخول الكوميديا على الخط، والفضل الأول للكوميديا يرجع للحوار اللي كان مكتوب بشكل شيق. أما اخراج الفيلم فاقدر يوازن بين الكوميديا والاكشن واستعراض الحالة الثقافية والتاريخية للصين في فترة من فترات تاريخها الصعب وده شيء يحسب للاخراج.
الديكورات والموسيقى والأزياء
للأسف كنا متوقعين أكتر من كده على صعيد الديكورات والموسيقى، وكان نفسنا الفيلم يقدم لنا تجربة بصرية مختلفة وقوية لكن للأسف ده لم يحدث، على الرغم من تميز الأزياء وتماشيها مع العصر اللي بيتناوله الفيلم لكن اختيار مواقع التصوير والديكورات لم يكن موفق، كمان الموسيقى التصويرية فشلت في احساسنا بجزء كبير من الأحداث على الرغم من الجهد الواضح المبذول فيها.
الخلاصة
Railroad Tigers فيلم أكشن كوميدي خفيف وظريف وبنرشحه للمشاهدة للناس اللي زهقت من أفلام هوليود التقليدية.
علشان تبقى عارف:
نجم الحركة الشهير جاكي شان من مواليد سنة 1952 يعني عنده دلوقت حوالي 62 سنة!
