أفلام عيد الأضحى 2017
كل سنة وانتم طيبين.. ولو حد قال لكم ان عيد الأضحى هو عيد اللحمة، ودي هي الكلمة الأولى اللي بتتقال كمحاولة للتهرب من دفع العيدية.. في الحالة دي لازم تقاتلوا علشان تاخدوا العيدية بتاعتكم.. علشان فيه 7 أفلام عربية هاتتنافس على العيدية بتاعتكم السنة دي في موسم عيد الأضحى.. تعالوا نتعرف عليهم أكتر.
الكنز
مش بس واحد من أهم الأفلام في عيد الأضحى، لكنه ممكن يبقى واحد من أهم الأفلام في تاريخ السينما في مصر. لانه معتمد على فكرة الأفلام المكونة من مجموعة أجزاء وهى فكرة جديدة على السينما المصرية، وثانيا لاشتراك عدد كبير من النجوم في بطولته زي هند صبري وروبي ومحمد سعد و محمد رمضان و هاني عادل وهيثم احمد زكي وغيرهم.
الفيلم بيتنقل بينا بين مجموعة من العصور وبيتتبع قصة حياة مجموعة من الأشخاص عبر العصور دي وازاي بيتفاعلوا مع بعض. والقصة فيها جزء كبير من الغموض وعدم الموضوع.
الكنز من تأليف شريف عرفه وسيناريو وحوار عبد الرحمن كمال ومن اخراج شريف عرفه.
إعلانه الفيلم
الخلية
من أفلام الاكشن اللي سمعنا عنها كلام كتير في الفترة اللي فاتت. الفيلم بيحكي عن ظابط في العمليات الخاصة بيقوم بمجهودات كبيرة لمكافحة الإرهاب، والفيلم بشكل عام بيعرض الجهود الكبيرة اللي بتبذلها الوحدات دي للحفاظ على أمن البلد والناس.
الخلية من تأليف صلاح الجهيني ومن اخراج طارق العريان وبطولة أحمد عز ومحمد ممدوح و سامر المصري وأمينة خليل.
اعلان الفيلم
خير وبركة
نجم مسرح مصر على ربيع بيستغل نجاحه وبيقدم لنا فيلم كوميدي مع تارا عماد و محمد عبد الرحمن و مي سليم، عن أخين بيدوروا عن فرصة عمل وبيواجهوا سلسلة لا تنتهي من المواقف الكوميدية أثناء البحث عن شغل.
الفيلم من اخراج سامح عبد العزيز ومن تاليف جورج عزمي، وفكرة الفيلم من نصيب على ربيع برضو.
اعلان الفيلم
شنطة حمزة
جولة في عالم النصب بياخدنا لها حماده هلال من خلال أحدث أفلامه السينمائية شنطة حمزه.. شنطه حماده في عيد الأضحى بتحكي عن شاب متخصص في النصب بيتعرف على بنت بتشتغل في نفس المجال وليها شخصية قوية. ياترى ايه ممكن يحصل بينهم؟
الفيلم من تأليف أحمد عبد لله و اخراج اكرم فاروق وبطولة حماده هلال و سامية الطرابلسي و بيومي فؤاد ومحمد ثروت.
اعلان الفيلم
بث مباشر
ومن الكوميديا للاكشن، فارس ظابط شرطة موقوف عن العمل، بيتعرض خلال ليله واحدة فقط لكمية كبيرة من الضغوط والمشاكل والحوادث واللي بيتم بث احداثها كلها على السوشيال ميديا علشان تحقق اعلى نسب مشاهدة، ومن خلال الحوادث دي بنبدأ نكتشف مجموعة كبيرة من قضايا الفساد في البلد.
الفيلم من تأليف طارق رمضان وإخراج مرقس عادل وبطولة سامح حسين وطاهر أبو ليله ومصطفى عباس وايمن منصور
https://www.youtube.com/watch?v=8H0eeeE3_44
أمان يا صاحبي
فيلم غنائي خفيف من بطولة سعد الصغير ومحمود الليثي، بيحكي عن اتنين مافيش معاهم فلوس بيضطروا يتزوجوا بنتين من أسرة غنية. ومن هنا بتبدأ سلسلة من الاحداث الكوميدية تحصل لهم.
الفيلم من اخراج هاني حمدي و تأليف سيد السبكي وبيشارك سعد الصغير ومحمود الليثي البطولة عبد الباسط حموده والراقصة صوفينار.
اعلان الفيلم
هروب مفاجئ
من الأفلام اللي كانت مؤجلة لفترة طويلة ثم ظهرت أخيرا للنور. فيلم “هروب مفاجئ” بطولة أشرف مصيلحى و ساندى ونرمين ماهر و حسام فارس و مراد فكرى والفيلم سيناريو وحوار سامح فرج، وإخراج إبرام نشأت وبيحكي عن الاثار السلبية اللي ممكن تحصل لمجموعة شباب لما يفشل أهلهم في تربيتهم بشكل صحيح.
اعلان الفيلم
https://www.youtube.com/watch?v=9WL69_MhFhY
