رمضان 2017. الأفضل والأسوأ
موسم درامي ثري ومميز. هو ده الوصف اللي نقدر نوصف بيه موسم رمضان 2017 الدرامي. أعمال قوية ومسلسلات مؤثرة وتنويعات هامة. لكن هل كل مسلسلات رمضان 2017 كانت قوية ومؤثرة؟ طبعا لا. علشان كده في الموضوع ده هانستعرض الأقوى والأضعف في دراما رمضان السنة دي.
عفاريت عدلي علام.. سقوط الزعيم في فخ التكرار
حالة من الصدمة بتواجه جمهور الزعيم عادل إمام مع فشل مسلسله في تحقيق رد فعل إيجابي زي ما تعودنا دائما من الزعيم صاحب الأجر الأعلى والأقدر على المنافسة حتى اليوم في سوق السينما والدراما.
عادل امام وقع في فخ التكرار وقدم شخصية مكررة وأحداث مكررة، بالإَضافة لتيمة مجلس والشعب واللي أصبحت مكررة وغير كوميدية وغير مجديه بالمرة. كتير من الناس بتنصح الزعيم يغير من جلده، والأهم: يغير كاتبه المفضل يوسف معاطي!
ريح المدام: أحمد فهمي ينجح في تقديم الكوميديا وحده
على الرغم من توقعاتنا الغير مرتفعة بخصوص المسلسل، لكن الحقيقة أن النتيجة النهائية بتقول أننا أمام واحد من أفضل المسلسلات الكوميدية في رمضان 2017. أحمد فهمي بالتعاون مع أكرم حسني ومي عمر قدروا يقدموا توليفة كوميدية جيدة ومميزة وتستحق المشاهدة.
طاقة نور.. أكشن ضعيف من هاني سلامه
على الرغم من نجاح مسلسلات الحركة في رمضان 2017، لكن مسلسل طاقة نور كان محتاج يكون أقوى من النتيجة النهائية اللي شوفناها على الشاشة. الأكشن في الفيلم كان ضعيف والمستوى الإخراجي كان محتاج يكون افضل بكتير من النتيجة النهائية اللي شوفناها أمامنا على الشاشة. هارد لك هاني سلامه!
واحة الغروب. أداء مميز من خالد النبوي
أما مسلسل واحة الغروب فقدر خالد النبوي يقدم فيه أداء مميز، خاصة أن المسلسل نفسه مكتوب كويس جدا ومقتبس عن رواية بتحمل نفس الاسم للكاتب المميز بهاء طاهر. كمان منة شلبي قدمت أداء مميز ومختلف وتستحق عليه التحية.
خلصانه بشياكه: خلصانه بزعل محبي مكي!
محبي أحمد مكي ورغم فرحتهم بقرار انضمامه لشيكو وهشام ماجد في أحدث أعمالهم الدرامية، لكن ضعف المسلسل وعدم قدرته على تحقيق مشاهدات قوية أكد على أن الفريق الجديد محتاج يشتغل أكتر على نفسه خصوصا فيما يتعلق بالكتابة والإخراج، علشان مستوى مسلسل خلصانه بشياكه رغم انه جيد لكنه لا يرقى لمستوى أحمد مكي اللي عودنا عليه.
ظل الرئيس.. ميلاد نجم جديد
على الرغم من تخوفنا من قدرة ياسر جلال على تحمل بطولة عمل كامل لوحده، لكن ياسر قدر يعمل المستحيل ويقدم مسلسل مميز وقادر على المنافسة في السباق الرمضاني. لازم نرفع له القبعة.
هربانه منها.. النجاح هرب من ياسمين عبد العزيز!
واحد من أسوأ المسلسلات الكوميدية في رمضان2017. ياسمين عبد العزيز للأسف هرب منها النجاح مع تقديمها لنفس الأداء اللي بتقدمه في كل مسلسلاتها وأعمالها السينمائية من يوم ما بدأت تمثيل وحتى اليوم!
لا تطفىء الشمس.. تأرجح بين النجاح والفشل
من أكتر المسلسلات اللي أثارت الجدل في رمضان 2017. الغريب في لا تطفىء الشمس إن مالوش حلول وسط. إما تعشقه حتى النخاع أو تكرهه لأخر يوم في عمرك! إحنا عن نفسنا حبيناه.. إنتو أيه رايكم؟
30 يوم.. هذا النجاح الرائع
واحد من أنجح المسلسلات في رمضان 2017 في رأينا. وقدرة غير عادية من باسل خياط وأسر ياسين على تقمص شخصياتهم للحد الأقصى. بجد لازم نخلع القبعة احتراما للمواهب دي.
الزيبق: اللعب في المضمون
أما مسلسل الزيبق فا قدر يحقق نجاح جيد متناسب مع ميزانيته اللي ممكن تكون مش أعلى ميزانية في رمضان2017، ولولا بعض الأخطاء فيما يتعلق بأن أحداث المسلسل بتدور في 1998 بينما بتظهر طوال الوقت أجهزة كمبيوتر وسيارات حديثة جدا ضمن الأحداث. كان ممكن نعتبر المسلسل متميز فعلا. عموما الزيبق بيلعب في المساحة المضمونة من الدراما في مصر. وهى أعمال المخابرات.
