كارت ميموري: تأجيل الفيلم أضر به

بننتظر الأفلام العربية اللي بيتم طرحها في الموسم السينمائي بعيدا عن فترات الأعياد والأجازات بفارغ الصبر علشان بتكون زي (تصبيرة) تعطينا جرعة أمل في اللي ممكن نشوفه في فترة الأعياد، لكن للأسف فيلم (كارت ميموري) كان تصبيرة سيئة الى درجة كبيرة. تعالوا نتعرف أكتر على تجربتنا معاه.

القصة

الفيلم بيحكي عن محامي شاب بيعيد الربط بين مجموعة من القضايا اللي تم الحكم فيها بالأعدام اعتمادا على معلومات بيجدها على كارت ميموري، الامر اللي بيقوده لشبكة من العلاقات والأحداث اللي تتسم بالغموض والأثارة.

فريق العمل

الفيلم من أخراج خالد مهران ومن تأليف محمود فليفل ومن بطولة خالد سليم وأحمد منير و دينا فؤاد و محمد نجاتي وعزت أبو عوف ورانيا محمود يس

الأداء التمثيلي

على الرغم من مشاركة أسماء كبيرة في عالم التمثيل إلا أن الأداء التمثيلي لأبطال الفيلم كان ضعيف وكان محتاج يكون أقوى من اللي شوفناه على الشاشة، ولكن الأداء التمثيلي كان مظلوم بسبب عوامل ضعف الفيلم التانيه زي السيناريو والحوار والأخراج واللي كان لازم يكونوا أفضل من كده.

السيناريو والحوار والأخراج

سيناريو الفيلم كان ضعيف وكان محتاج يكون أقوى، وترك السيناريو عبء إدارة  الأحداث بالكامل على الحوار اللي على الرغم من قوته ماقدرش يستحمل عبء التحرك الدرامي في الأحداث، وده في النهاية كان خطأ المخرج اللي ماقدرش يدير ممثليه بالشكل المناسب علشان يقدم في النهاية فيلم قوي

الديكورات والموسيقى والأزياء

على الرغم من أن معظم تصوير الفيلم تم في مشاهد وديكورات داخلية لكن مستوى الديكورات كان ضعيف وكان محتاج يكون أفضل، وبشكل عام مستوى الفيلم بالكامل كان اقل من المستوى اللي كنا متوقعينه.

الخلاصة

كارت ميموري كان ممكن يكون فيلم أفضل لو تم الاهتمام به انتاجيا واخراجيا أكتر

علشان تبقى عارف:

خالد سليم بطل الفيلم من مواليد الكويت سنة 1975 ثم انتقل لمصر وبدأ يدخل عالم الغناء والطرب بشكل محترف بداية من سنة 2000 تزامنا مع طرح ألبومه بعنوان عالم تاني. ثم اقتحم عالم الفن والتمثيل سواء للسينما أو للتليفزيون.