A Bad Moms Christmas: فيلم من ريحة الكريسماس في السينمات

مع اقتراب موسم الكريسماس بتظهر مجموعة من الأفلام اللي بتحكي عن اليوم ده، وجرت العادة أن الأفلام دي تكون اما كوميدية أو رومانسية خفيفة لاستغلال جو الأعياد ومغازلة الناس اللي عاوزه تدخل السينما في اليوم ده أو تتفرج على فيلم لطيف أمام المدفأة. فيلم A Bad Moms Christmas بينتمي باقتدار للفئة دي من الأفلام.

القصة

الفيلم بيحكي عن مجموعة من الصديقات واللي بتشغلهم مشاكل وطلبات أولادهم طوال الوقت، وطوال الوقت عندهم شعور بالضعط وعدم قدرتهم على ممارسة حياتهم بشكل طبيعي بسبب أولادهم، ومع اقتراب موسم الأعياد بتتلقى كل واحدة فيهم مكالمة من والدتها بتقول لها أنها هاتقضي معاها الكريسماس، وده بياخدنا لمستوى جديد من المواقف الكوميدية المتفجرة.

فريق العمل

الفيلم من اخراج جون لوكاس ومن تأليف  سكوت مور ومن بطولة ميلا كونيس و كريستين بيل و كاثرين هان و جاي هيرنانديز و كرستين بارانسكي

الأداء التمثيلي

بما أننا بنتكلم عن جزء ثاني، فا أبطال الفيلم قدروا يحافظوا على امتداد شخصياتهم من الجزء الأول بشكل جيد جدا، ودي كانت مشكلة بنلاحظها في كتير من الأجزاء الثانية للأفلام وهي فشل الممثلين في الحفاظ على الخيط العام لشخصياتهم. لكن A Bad Moms Christmas قدر أبطاله يحافظوا على ثبات الشخصيات وتولت الأحداث تطوير السيناريو والكوميديا في الأحداث.

السيناريو والحوار والأخراج

سيناريو الفيلم كان معتمد على أسلوب انه لا يترك مشهد واحد بدون جانب كوميدي، سواء الكوميديا دي كانت في الحوار أو الأداء التمثيلي أو أي عنصر تاني من العناصر المكونة للفيلم. والحقيقة أن الفيلم نجح في ده بشكل كبير، ولم نشعر بالملل خلال الأحداث وده يعتبر نجاح للإخراج كمان.

الديكورات والموسيقى والأزياء

ديكورات الفيلم كانت جيدة ورجعت لنا الشعور من  جديد   بموسم الأعياد وبرودة الشتا اللي بتبقى محببة في وقت الكريسماس. لكن الموسيقى التصويرية كانت محتاجه تكون أفضل وأقوى وأكثر تأثيرا من اللي شوفناه من خلال الأحداث.

الخلاصة

فيلم A Bad Moms Christmas متوسط على صعيد الكوميديا لكن محبي أفلام الكريسماس والمناسبات هايجدوه فيلم جيد ويستحق المشاهدة.

علشان تبقى عارف: الفيلم يعتبر ثالث تعاون بين النجمتيّن (ميلا كونيس، وكريستن بيل) بعد تعاونهم في فيلم (Forgetting Sarah Marshall) من إنتاج 2008، وفيلم (Bad Moms) من إنتاج 2016.