Renegades: كوميديا وأكشن بلا توقف
على الرغم من أن تيمة الفريق المكون من مجموعة من رجال القوات الخاصة اللي بيذهبوا مع بعض في مهمة خاصة وانتحارية أصبحت فكرة مكررة وشوفناها في أكتر من فيلم، إلا ان تكرارها يعتبر من الأمور المحببة لنفسنا واللي بنحب نشوفها مرات ومرات بدون شعور بالملل. تعالوا نتعرف أكتر على Renegades
القصة
الفيلم بيحكي عن مجموعة من أمهر رجال القوات الخاصة وأكثرهم جرأة، واللي بتقودهم أحداث الفيلم لاكتشاف كنز كبير من الذهب موجود في قاع بحيرة في البوسنة. ياترى باقي أحداث الفيلم هاتاخدنا على فين؟ ده السؤال اللي مش عاوزين نجاوبكم عليه علشان تتابعوا الأحداث بنفسكم.
فريق العمل
الفيلم من تأليف ريتشارد وينك و لوك بيسون وأخراج ستيفن كولي وبطولة سوليفان ستابليتون و جي كيه سيمونز و إيوان بريمنر و ديارماد مورتاج و كليمنز شيك
الأداء التمثيلي
الأداء التمثيلي لكل أبطال الفيلم كان جيد ونخص جيه كيه سيمونز واللي عرف يقوم بدوره بشكل جيد. لكن الحقيقة أن النوعية دي من الأفلام مش بتحتاج مواهب تمثيلية قوية بقدر ما تحتاج لياقة بدنيه والرغبة في تقديم مشاهد حركه متميزة وهو ده اللي حصل فعلا.
السيناريو والحوار والأخراج
المميز في سيناريو الفيلم أنه بيقدم متعة المشاهدة من المشهد الأول للأخير بدون مايترك فرصة للمشاهدين أنهم يشعروا بالملل، لكن الأخراج ماقدمش أي جديد على مستوى الصورة أو زوايا التصوير وحركة الكاميرا، لكن الخدع السينمائية تفوقت على نفسها خصوصا في مشاهد الدبابات اللي خرجت بشكل رائع ومميز.
الديكورات والموسيقى والأزياء
في النوعية دي من الأفلام مش بيتم الاهتمام بالموسيقى أو الديكورات بشكل كبير. لكن الاهتمام الأكبر بيكون بالأكشن والحركة وإخراج مشاهد المطاردات. ولو قيسنا الموسيقى والديكور على العامل ده هايكون مستواهم جيد.
الخلاصة
Renegades فيلم أكشن جيد بننصح بمتابعته لكل محبي الحركة والمطاردات مع لمسة كوميدية.
علشان تبقى عارف:
تقييم الفيلم على IMDB 5.6 من 10
