Amityville The Awakening: هل الأرواح ممكن تشفي من الأمراض؟

حالة من الترقب الشديد صاحبت تقديم فيلم Amityville The Awakening للسينمات. مش بسبب جرعة مشاهد الرعب أو ترقب الناس للنوعية دي من الأفلام، لكن بسبب أن ده أول الأفلام اللي تقدمها ستوديوهات Weinstein بعد فضيحة هارفي وانستين الخاصة بالتحرشات الجنسية و اللي تسببت في زعزعة أفلام الشركة ومركزها في السوق.

القصة

Amityville The Awakening بيحكي عن أم عايشة لوحدها مع أطفالها، وبتضطر تنتقل بيهم لمنزل مسكون بالأشباح، كحل أخير علشان تقدر تعالج إبنها، لكن الأمور بتخرج عن السيطرة وبيتحول الأمر من محاولة للشفاء لمحاولة للنجاة بأرواحهم وعقولهم.

فريق العمل

الفيلم من تأليف وإخراج فرانك كالفون ومن بطولة هانتر جوليجوسكي و مكينا جرايس و بريان بريتر و توماس مان و كيرتووود سميث

الأداء التمثيلي

في الغالب مش بنحتاج نشوف أداء تمثيلي مبهر في أفلام الرعب، لإن المطلوب من الممثلين عادة بيكون إظهار الرعب والهلع في العيون والتصرفات، لكن لازم نقول أن الأداء التمثيلي ل جينيفر جيسون لي و بيلا ثورن كان مميز وقدر يعيشنا في السياق العام للأحداث بشكل رائع ومميز.

السيناريو والحوار والأخراج

سيناريو الفيلم بسيط وبيسير في اتجاه واحد بدون تعقيد، وتم الأعتماد على الحوار علشان ينقل لنا مشاعر الأبطال بشكل كبير، أما الأخراج فا وقع عليه العبء علشان يقدم لنا مشاهد الرعب بشكل قوي ومميز، والحقيقة أن الأخراج نجح في مهمته لكن ما حسيناش أننا وصلنا لمرحلة الهلع. لكن كشعور بالرعب لازم نعترف أن بعض المشاهد فعلا كانت مرعبة للغاية

الديكورات والموسيقى والأزياء

ديكورات الفيلم كانت أكتر من رائعة، وقدرت تجسد لنا الشعور بالأقامة في منزل مسكون، كمان الموسيقى التصويرية والمؤثرات الخاصة لعبت دور مهم جدا في زيادة جرعة الرعب في الفيلم.

الخلاصة

فيلم Amityville The Awakening مش أفضل أو أقوى فيلم رعب شوفناه في حياتنا، لكنه فيلم مناسب جدا لعشاق النوعية دي من الأفلام، ولمحبي أفلام المنازل المسكونة على الخصوص.

علشان تبقى عارف:

تقييم الفيلم على موقع IMDB 4.9 من 10