Spider-Man Into the Spider-Verse : مغامرة مختلفة للرجل العنكبوت
على الرغم من أن كلنا تقريبا عارفين القصص الخاصة بسبايدر مان. واللي بتدور في معظمها عن مراهق بيتعرض للعض من عنكبوت وبيحصل بعدها على قدرات خارقة، إلا أننا مش بنزهق من تكرار القصة والتنويعات المختلفة اللي بيتم تقديمها عليها.
وفي حالة Spider-Man Into the Spider-Verse الحبكة وطريقة تقديمها بتختلف شوية. خاصة في المنطقة العربية اللي تم تقديم الفيلم فيها بنسخة مدبلجة. ربما لم تحصل على اعجاب كتير من الجمهور زي ما ناقشنا في واحد من موضوعاتنا كمان عرفنا أن فيه مؤلف عربي شارك في تأليف القصة اللي تم تحويلها لفيلم وناقشنا ده هنا لكن ياترى ايه قصة الفيلم المرة دي؟
الفيلم بيحكي عن مايلز مورالز (قام بالأداء الصوتي شاميك مور) واللي بيعتبر شاب له قدرات دراسية ممتازة، لكنه بيشعر بعدم القدرة على التأقلم مع المدرسة الجديدة اللي انتقل لها مؤخرا، لكن حياته بتتقلب رأسا على عقب لما بيتعرض لعضه من عنكبوت خاص بيحوله للرجل العنكبوت. لكن الجديد في الفيلم هي أن العالم اللي بتدور فيه الأحداث فيه سبايدر مان بالفعل!
ومن هنا بنشوف الاختلاف في القصة ان كل (الرجال العنكبوت) في العالم هايجتمعوا مع بعض علشان يواجهوا خطر كبير بقيادة شرير الفيلم ويلسون فيسك (قام بالأداء الصوتي لدوره ليف شريبر) والحقيقة ان الشرير هنا شافه قبل كده محبي مسلسل daredevil واللي قدمته مارفل بالتعاون مع شبكة نت فليكس عن بطل خارق بيعاني من العمى!
من أجمل الحاجات اللي عجبتنا في الفيلم هي الجرافيكس المميزة، واسلوب تقديم الشخصيات على الشاشة واللي كانت شبه تصفحنا لقصة كوميكس. ودي كانت من المميزات الرائعة في الفيلم واللي شدت نظر الكبار والصغار على حد سواء.
لكن تطور شخصيات ابطال الفيلم من البداية للنهاية (ونقصد هنا شخصية مايلز) كان غير موفق. وحسينا أن اخراج رودني روثمان و بوب بيرسيتشيتي و بيتر رامسي ماقدرش يقدم لنا الحبكة الصحيحة لتغير شخصية مايلز بالشكل اللي شوفناه في الفيلم.
Spider-Man Into the Spider-Verse من افلام الانيميشن المبذول فيها مجهود مميز كان يصلح يقدم مسلسل كامل مش مجرد فيلم. وننصح بمشاهدته للكبار والصغار على حد سواء.
