Malicious : فيلم رعب تقدروا تستنجوا كل أحداثه!
كتير من الوقت بنشعر أن بعض الأفلام بيتم تقديمها في السينمات فقط علشان المنتجين والمخرجين يلاقوا فرصة وضع أسمهم على الساحة وتقديم نفسهم كناس عندها أعمال سينمائية بيتم عرضها في السينمات. أما عن النجاح. ده بيكون أخر شيء بيسعوا له. والغرض الأساسي بيكون تحقيق الأرباح من خلال البيع على أسطوانات أو من خلال خدمات المشاهدة المدفوعة زي Netflix على سبيل المثال لا الحصر. وبنعتقد أن فيلم Malicious يعتبر واحد من الأفلم دي.
Malicious بيحكي عن زوجين في انتظار أول مولود لهم. لكن بتبدأ مجموعة من الأحداث المرعبة والغامضة في الحدوث حواليهم، الأمر اللي بيخليهم يشعروا أنهم بيتعاملوا مع كيان شرير غير عادي. وده بيخليهم يحاولوا يستعينوا بحد أكثر تخصصا وفهما للعالم الغريب ده.
زي ما قولنا مافيش أي جديد على مستوى القصة أو السيناريو اللي كتبهم مايكل وينيك. ومايكل مشهور بأعمال على نفس المستوى تقريبا زي Guns, Girls and Gambling أو Code of honor وغيرها من الأعمال اللي بتدور في نفس الفلك من التكرار و (النحت).
على صعيد التمثيل بنشوف بوجانا نوفاكوفيتش في دور ليزا والحقيقة أنها قدرت تقدم دور قوي وتقدمه بشكل جيد على الرغم من ضعف الفيلم بشكل عام. كمان ديلروي ليندو في دور الدكتور كلارك كان دور مميز وقدر ليندو يقدمه بشكل جيد يجعله تقريبا صاحب أفضل أداء تمثيلي في الفيلم.
من أهم الأمور اللي ما عجبتناش في الفيلم المؤثرات الخاصة والخدع السينمائية واللي مستواها كان ضعيف جدا. كمان الحبكة المكررة والقصة اللي شوفناها في ألف فيلم رعب تاني. وطبعا إسلوب الرعب بالخضات واللي يعتبر من أقل أساليب الرعب احترافية واللي بيتعود عليها المشاهد بعد مشهدين أو ثلاثة بالكتير.
Malicious فيلم رعب مش بيقدم أي جديد. لكن هايعجب المهووسين بأفلام الرعب ومتابعي كل جديد بيظهر في السينمات حتى لو مستواه ضعيف.
