توقعات الأبراج في 2019
ناس كتير بتحب تشوف الأبراج بتقول لها ايه. خاصة مع نهاية سنة وبداية سنة جديدة. وكل يوم بنشوف توقعات جديدة من خبراء في عالم الأبراج. علشان كده قررنا نسمع منهم كلهم ونقدم لكم في النهاية خلطة من كل توقعاتهم لكل برج من الأبراج في 2019
توقعات برج الحمل لسنة 2019
سنة 2019 تعتبر من أفضل السنوات اللي هاتمر على مواليد برج الحمل. وخاصة في الربع الأول من السنة اللي هاتتحل فيه كتير من مشاكل مواليد برج الحمل واللي حصلت في نهايات 2018. أما شهر مارس وأبريل فهي من الشهور المميزة لمواليد الحمل. وهايقدروا يحققوا فيها نجاحات كبيرة على المستوى العملي والشخصي كمان. ما ننكرش أن بعض المشاكل والمشادات الشخصية ممكن تحصل في منتصف 2019. لكن هاتمر بسلام ومش هاتسيب تأثير طويل المدى على علاقة مواليد الحمل بحبايبهم.
توقعات برج الجوزاء لسنة 2019
أما مواليد برج الجوزاء فا حياتهم ها تتغير بشكل كبير خلال 2019. خاصة محبي السفر والجنان. هايكون قدامهم فرصة ذهبية لحد منتصف شهر مايو تقريبا علشان يمارسوا كل جنانهم بمنتهى الأريحية. أما مواليد برج الجوزاء اللي لسه سنجل. الفرصة هاتكون مناسبة لهم في شهر يوليو علشان يرتبطوا بنصفهم الثاني. لكن شهر يونيو مش بيحمل أخبار سعيدة على الصعيد المادي. علشان كده مواليد الجوزاء لازم ياخدوا بالهم من قراراتهم المالية بداية من أول السنة.
توقعات برج الأسد لسنة 2019
بدايات 2019 مش هاتقدم تطورات كتيرة لمواليد برج الأسد. لكن مع بدايات شهر سبتمبر الى ديسمبر. كل الحاجات الجميلة اللي كانت مستنيه مواليد برج الأسد هاتحصل لهم. لكن لازم ننصح مواليد الأسد بالتفكير الإيجابي والمختلف في حل مشاكلهم. لأن التفكير النمطي داخل الصندوق مش هايجيب نتيجة في 2019 خالص.
توقعات برج الميزان لسنة 2019
مواليد برج الميزان اللي كانوا بيعانوا من مشاكل مادية في 2018. نحب نقول لهم أن المشاكل دي مش بس هاتنتهي. لكن كمان هايقدر مواليد الميزان يحققوا أرباح مادية كبيرة في منتصف السنة. كمان فيه فرص عمل مميزة للناس اللي خسرت وظايفها – او ماشتغلتش خالص- في 2018.
توقعات برج القوس لسنة 2019
للأسف الشديد وعلى الرغم من الحظ السعيد في 2018 لمواليد برج القوس، إلا أن حظ القوس هايتراجع لحد شهر مايو تقريبا. بعد كده هايرجع الحظ السعيد تاني في زيارة القوس لحد أخر السنة. لكن مواليد القوس هايكون عليهم ياخدوا قرارات صعبة على الصعيد العملي والعاطفي خلال 2019. وننصحهم بالتفكير بحكمة وعدم اتخاذ قرارات سريعة أو متهورة.
توقعات برج الدلو لسنة 2019
بداية برج الدلو في سنة 2019 هاتكون محيرة شوية. يعني مافيش فشل واضح أو نجاح واضح. لكن مع الوصول لمنتصف السنة الحياة الاجتماعية لمواليد الدلو هاتزدهر من خلال صداقات جديدة وعلاقات اجتماعية مثمرة ممكن يظهر من خلالها كمان فرص شغل في مجالات جديدة.. إستعدوا يا مواليد الدلو!
توقعات برج الثور لسنة 2019
للأسف سنة 2019 مش هاتكون أفضل سنة بالنسبة لمواليد برج الثور. لكن الكويس إنه ممكن مواليد الثور يتجاوزوا الأحداث الصعبة اللى هاتمر عليهم على الصعيد العاطفي والمالي والعملي في 2019 لو عرفوا ياخدوا بالهم من بداية السنة. سواء بإتخاذ قرارات احترازية من دلوقت. أو أنهم ياخدوا حذرهم بشكل عام خاصة في بدايات 2019
توقعات برج السرطان لسنة 2019
سنة 2019 هي سنة السعد على الصعيد الوظيفي لمواليد برج السرطان. الشباب اللي مش لاقيه شغل ومن مواليد السرطان فرصتهم في الحصول على وظيفة هاتكون أكبر. أما اللي بيشتغلوا فعلا. نحب نقول لهم أنهم ممكن يحصلوا على ترقية أو أخبار سعيدة بشكل عام. كمان على الصعيد العاطفي هايكون فيه أخبار كويسه جدا لمواليد السرطان.
توقعات برج العذراء لسنة 2019
ماشوفناش حد حظه كويس في 2019 زي حظ مواليد برج العذراء. سواء على الصعيد العملي أو المالي أو حتى العاطفي. كل الأخبار هاتكون كويسه وكل الأحداث هاتكون سعيدة. ومن بداية السنة لنهايتها تقريبا كل يوم هايكون مواليد العذراء هايحمل لهم خبر سعيد وجديد.
توقعات برج العقرب لسنة 2019
لو كنت من مواليد برج العقرب، وكنت بتشتغل في شغل له علاقة بالإبداع والأفكار المتجددة. سنة 2019 هاتكون الأروع على الصعيد العملي لبرج العقرب. خاصة اللي شغلهم له علاقة بالأفكار الجديدة. لأن الفترة من بداية شهر مارس لنهاية السنة هايكون فيها أفكار كتير جديدة ومبتكرة لهم. كمان على الصعيد العاطفي فيه فرص كويسة جدا للتوافق مع أشخاص تانيه.
توقعات برج الجدي لسنة 2019
برج الجدي في 2019 مش هايكون في أفضل حالاته. على الأقل في الفترة الأولى من السنة. وهياخد مواليد برج الجدي بعض القرارات اللي هاتكون صادمه بالنسبة لهم. خاصة على المستوى العاطفي والإنساني. كمان على مستوى الشغل ممكن يكون فيه بعض العقبات اللي بنحذر منها مواليد برج الجدي.
توقعات برج الحوت لسنة 2019
وأخيرا برج الحوت. واللي هايشوف أيام مميزة جدا في 2019 على الصعيد المهني والعاطفي. لكن ده مش هاينعكس على الصعيد المالي واللي هايمر مواليد برج الحوت خلال 2019 ببعض فترات التقلبات والخسارة المادية. خاصة في فترة نهاية السنة. علشان كده بننصح مواليد برج الحوت ياخدوا الحذر خلال 2019 في ربعها الأول.
