Overlord : تجربة نازية مثيرة للهلع
في بداية مشاهدتنا لفيلم Overload كنا متصورين أننا أمام فيلم عن أهوال الحرب. والرعب (التقليدي) اللي ممكن يواجه مجموعة من الجنود المحترفين في فترة الحرب. ثم أكتشفنا أن السيناريو مخبي لنا أكتر من كده وبيقدم قصة رعب غير عادية.
فيلم Overload بيحكي عن مجموعة من الجنود اللي بتتوجه لأحدى القرى المهجورة في زمن الحرب العالمية الثانية. ثم بيكتشفوا وجود مجموعة من الكائنات الغريبة والغير عادية واللي بتتخطي حدود الخيال. وفق تجربة سرية قامت بيها قوات النازي في المنطقة. أدت لخلق كائنات غريبة ومرعبة الى أقصى حد.
مخرج الفيلم جوليوس أفيري ماعندوش تجارب سينمائية طويلة كتير. أخرج قبل كده فيلم Son of a Gun في 2014 بالإضافة لمجموعة من الأفلام القصيرة. لكن في النهايه النمط الإخراجي اللي إتبعه كان جيد. وقدر يقدم فيلم مثير وفيه مشاهد قوية ومتعوب عليها.
ولتعويض نقص خبرة المخرج تمت الاستعانة بالمؤلف بيلي راي علشان يكتب قصة وسيناريو الفيلم. وهو صاحب قصص أفلام قوية زي Captain Phillips و The Hunger Games و أعمال تانيه قوية ومؤثرة.
أما في البطولة بنشوف جوفان أديبو في دور بويس و وايت راسل في دور فورد و ماتيلد وليفييه في دور كلوي. والحقيقة أن ابطال الفيلم قدموا أداء تمثيلي قوي وقدرة جيدة على التأقلم مع المشاهد الخطرة وتنفيذها واللي كان على مستوى عالي ومميز.
من الأمور المميزة في الفيلم المؤثرات الخاصة وكيفية تطبيقها على الشخصيات اللي ظهرت في دور الكائنات المرعبة. لكن من ناحية تانيه كتير من مشاهد الفيلم ممكن تكون غير مناسبة للمشاهدين من فئات عمرية أصغر. علشان ممكن تصيبهم بالرعب.
Overload فيلم رعب له طبيعة خاصة. مش هايناسب محبي أفلام الرعب اللي بتتناول الأشباح والأرواح، لكن هايعجب محبي أفلام الرعب اللي بتتكلم عن الزومبي والكائنات الوحشية الغريبة.
