In Darkness : غموض يحبس الأنفاس في السينما
كتيرة هي الأفلام المثيرة اللي بتحاول تقدم جريمة قتل وفك لغز الجريمة بيتقاطع مع مشاكل وأحداث تانيه كتير. لكن قليلة هي الأفلام اللي بتقدر تقدم إثارة تكتم الأنفاس وتخلينا منتبهين تماما بنسبة 100% من المشهد الأول وحتى نهاية الفيلم. وده اللي شوفناه في In Darkness
In Darkness بيحكي عن سيدة كفيفة بتعيش لوحدها في منزلها. وبتشعر ببعض الألفة مع جارتها اللي بتسكن في الطابق العلوي، واللي بتتعرف عليها باستمرار من رائحة عطرها. لكن في أحد الأيام بيتم الإلقاء بالجارة من الشباك. في جريمة قتل بتستفز الرأي العام. ومن هنا بتبدأ كل أحداث الفيلم في التطور بشكل لا يصدقه عقل!
من أقوى الأمور اللي لفتت انتباهنا في الفيلم هي القدرات التمثيلية العالية والمميزة لبطلة الفيلم نتالي درومر. نتالي كان لها دور مميز في المسلسل الأشهر في العالم Game of Thrones كمان كانت من المشاركات في سلسلة أفلام The Hunger Hames ومشاركتها في In Darkness يعتبر واحد من أهم وأقوى أدوارها. كمان عرفنا أنها مؤلفة الفيلم. وكان من الواضح الاستعدادات الكبيرة اللي قامت بيها علشان دورها في الفيلم يطلع قوي ومميز.
إخراج أنتوني بيرن اعتمد على تقديم المشاهد المثيرة وراء بعضها بشكل متتالي. بحيث لا يترك الفرصة للمشاهدين للراحة أو التقاط الأنفاس. وده ساهم في شعورنا بالإثارة وعدم رغبتنا في مغادرة الكرسي أثناء العرض علشان لا يفوتنا لحظة واحدة من الأثارة والمتعة.
ديكورات الفيلم كانت جيدة جدا، واستخدام الإضاءة وزوايا التصوير حول بعض المشاهد لمشاهد مرعبة وده أضاف لأثارة الفيلم وقوة المشاهد الخاصة به.
In Darkness فيلم مثير وحماسي وفيه قدر عالي من الأداء التمثيلي الجيد. ونرشحه للمشاهدة لمحبي النوعية دي من الأفلام.
نصيحة كايرو360: تقييم الفيلم 5.7 من 10
